तिस वादे दे पूरे होणे दी आस लगायो, अहां दे बारांह गोत्र अपणे सारे मने नैं रात दिन परमात्मे दी अराधना करदे आये हन। हे राजा, इसा ई आसा दे बारे च यहूदी मिन्जो पर दोस लगांदे हन।
कने मैं यरूशलेम सैहरे च ऐई कित्ता; कने प्रधान याजकां ते हक्क पाई करी मतेआं पवित्र लोकां जो जेला च पाया, कने जाह़लू सैह़ मारी दित्ते जांदे थे तां मैं भी तिन्हां दे बरोधे च अपणी सलाह दिंदा था।
हर आराधनालय च मैं तिन्हां जो ताड़णा देई-देई करी यीशुये दी निंदा करवांदा था, ऐत्थु तिकर कि गुस्से दिया बज़ाह ते इतणा पागल होई गेआ कि दूयेयां सैहरां च जाई करी भी तिन्हां जो सतांदा था।
अपर तू उठ, अपणेयां पैरां पर खड़ोई जा; क्जोकि मैं तिज्जो इसतांई दर्शन दित्ता ऐ कि तिज्जो तिन्हां गल्लां दा भी सेवक कने गवाह ठैहरान, जेह्ड़ियां ते दिक्खियां हन, कने तिन्हां दा भी जिन्हां तांई मैं तिज्जो दर्शन दैणा।
कि तिन्हां दी अखीं खोलणे, कने नेहरे ते कड्डी करी जोतिया च कने सैताने दे हक्के ते परमात्मे दे राज्जे च लेई ओन। कि सैह़ पापां ते माफी पाई सकन, कने तिन्हां सामणै आई जान, जेह्ड़े मिन्जो च बसुआस दे जरिये परमात्मे तांई लग्ग कित्यो हन।’
अपर परमात्मे दिया बज़ाह ते मैं अज्जे तिकर जिन्दा ऐ कने छोटे बड्डेयां सबना सामणै गवाही दिंदा ऐ, कने तिन्हां गल्लां जो छड्डी करी होर कुच्छ नीं ग्लांदा जेह्ड़ियां भविष्यवक्तां कने मूसे भी ग्लाईयां कि होणे आल़िआं हन,
राजा भी जिसदे सामणै मैं निडर होई करी ग्ला दा ऐ, एह़ गल्लां जाणदा ऐ; कने मिन्जो बसुआस ऐ जे इन्हां गल्लां च कोई तिसते छुपियो नीं, क्जोकि इसा घटनां दे बारे च सारे लोकां जो पता ऐ।
पौलुस ग्लाणा लग्गा, “परमात्मे नैं मेरी प्रार्थना ऐ कि क्या थोड़े च क्या मते च, बस तू ई नीं जितणे लोक अज्ज मेरियां गल्लां सुणा दे हन, इन्हां बंधना जो छड्डी करी सैह़ मिन्जो साइआं मसीह बणी जान।”