ai so ažiukeren amare deš-u-dui kumpani, kai služin le Devles sakda riate ai diese. Si anda kudia kai ažiukerav, o amperato, kai thon beda pe mande le Židovuri!
Sa me kerdem ande o Jerusalem, me šiudem ande e temnitsa but anda le svintsi, lem kudia putiaria katar le bare raša, ai, kana mudarenas len, vi me simas le kavrensa.
Karing o maškar le diesesko, o amperato, me dikhlem pe e vurma ke strefial krugom mandar ai muře vortakondar jekh vedaria avel anda o čeri, ai o strefiamos sas mai baro sar o kham.
Ame peliam sa pe e phuv, ai me ašundem jekh hango kai phenelas mange židovitsko: Saul, Saul, sostar kjinuis ma tu? Trudno avela tuke te des palpale le pusaimata.
Numa, ušti, ai beš pe tjire punře; ke me sikavav ma tuke te thav tu ministero ai marturo pe le dieli kai tu dikhlian ai pe kudala kai me sikavava ma tuke,
eta tu te putres lenge jakha, te šai nakhen anda o tuniariko ka e vedaria ai katar e zor le Satanoski ka o Del, ke von te len, ke patian pe ande mande, o jertimos katar le bezexa ai t'avel lenge o svintsimos.
Ka kudala anda o Damasko angla savořende, porme ande o Jerusalem, ande sa e Judea, ka kudala kai či patian, me dem duma pa o keimos ai te pařuven pe ka o Del, te sikion le dieli kai keren te kein pe.
Numa, sar ažutisardias ma o Del, me ninkerdem ži adies, dav duma angla le bare ai le tsikne, bi te dav khanči rigate anda so le profeturi ai o Moše phende ke si t'aresel.
O Paul del palpale: Ke t'avel akana vai t'avel mai palal, drago t'avel le Devleske ke na ferdi tu, numa mai sa kadala kai si krugom mandar adies, t'aresen sar me sim, bi kakale lansonsa!