Ajenutu kesi kapak kana euja. Kelokokina kesi, ebeikinete kesi alimor, ebe atupa ka itung'a lu ericito ikisila ka edini kosi ajara eong' bala efarisayot.
Konye konyou, kogwo; naarai na nes atenikina atakanuna eong' kama kon, aseun ijo ajaanakin ka akitodiar iboro lu iyanyu ijo kama kang' nepepe ka ng'ulu lu etodikini eong' ijo,
kanuka ang'ar akonyen kes, tetere ibellkinosi alomun kotoma akirionus alosite acaus, bobo alomun ka apedor ka Asatanit alosite nama ka Akuju, tetere edumunete arimakino ka arokusio kes kiton alaro kamaka ng'ulu kalu italaute ka akiyuun kama kang'.’”
konye kagei eong' alimokini ng'ulu lu ajaasi Damaskas, kotupakini Yerusalem, kiton akwap kere nako Yudea, kiton bobo Ilong'au tetere kesi ibeleunosi nama ka Akuju ka asoma asomisio nu itodunete ebe ebelokinosi kesi.
Akitodol lolo, keng'arak eong' Akuju. Kanuka ng'un, agwoi eong' kane etodianari kamaka lucik kiton lukapolok, mam ace nu enera eong' adepar nu atemarito ikadwarak nepepe ka Musa ebe ebunete atubor:
Ejeni ejakait iboro lu, inerananasi eong' ka nesi kalakakina; naarai amunokiit eong' mam ibore ipede kamaka lu mam nesi kejeni, naarai mam nu esomao kotoma akirionus.
Kosodi Paulo atemar, “Keuriana kere de keuja, elipi eong' Akuju ebe mere osi bon konye bobo tetere ng'ulu kere lu epupete eong' lolo eraunete kwape kang' emam inyororon lu.”