Kana mangle te bichalen amen ande Italia, o Pablo ta aver llene kai sea ppangle die len kai iek kapitan kai ikkardola Julio, vou saia katar e boñikura kai ikkardona e Charoke.
Likistam ande iek llimia kai saia katar o Adramito ta llala karing e forura kai si pasa e mora katar e Asia. Amenchar saia i o Aristarko, kai saia katar e Tesalonika, foro katar e Masedonia.
Llelam poloke but llivesa ta dia amen but rado te ava angla o Knido. Ta sar e balau chalavela anglal nakklam angla o foro o Salmon ta nakklam truial katar e Kreta;
Ta sar kote kai achilea ni saia lacho te nakken o viend, but llene lendar ppende kai saia mai sukar te llantar ta te zumaven te resen ande Fenisia, iek foro katar e Kreta kai si pasa e mora ta leke dui riga den karing o nordeste ta karing o sudoeste, ta mangena te nakken kote o viend.
Ta kana e llimia saia andre ppanglela solenchar te achel mai chapeni e llimia e bari. Mapalal sar saia lenge dar te na achen achadine ande chisai kai ppenen lake Sirte, mukliarde o chiti e baliavake ta mukle te inllarel len e balau.
A sar nakklo but vreme ta ni jalam niso, o Pablo ustilo maskar sa e llene ta ppenda: —Manusalen, avilaia mai sukar te ttodena mange sama ta te na likistama katar e Kreta; gia ni nakklama gaia nuzda.
Nakkle desustar llive, ta iek riat achardam kai sama ande mora Adriatika ta e balau inllarela amen katar iek rig pe aver, ta kana saia ando dopas e rachako, acharde kai avaia pasa e ppuv.
A e llene kai sea sikade ande mora mangena te nasen katar e llimia, ta ttode te fuliaren e llimia minoni kai si nuzdake, ta cherenape kai ka chuden ogola sastrura anglal katar e llimia.
Kana lena te pparron e zor, o Pablo dia orba saurrenchar te jan vareso. Ta ppenda: —Cheren desustar llive kai ni jan niso cheres e dar kai si tumenge te meren.
Kana llivosailo, e llene kai sea sikade ande mora ni pinllarde savi ppuv saia goia, a dikkle e ppuv ta e chisai e moraki ta cherena te inllaren incha e llimia.
Chinde e sole kai sea ppangle pe sastrura, ta mukle len ande mora, ta mukliarde e kasta kai cherena te bangarel e llimia. Mapalal vazdie o chiti te llal e llimia, ta e llimia avili mai pase katar e ppuv.
A lleli orta kote kai saia but chisai, ta kote achili e rig angluni ande chisai, ta nasti miskolape a e rig e paluni drobolape soke chalavena e valura.
A sar o kapitan e boñikonengo ni kamela te merel o Pablo ppenda te na mundaren nika, ta ppenda te chudenpe ande mora mai anglal gola kai llanena te plivin te resen pe ppuv,