×

現代台語譯本漢字版

使徒行傳 28

1
阮安全上陸了後才知彼個島嶼叫做 馬爾他 。
2
當地的原住民對阮非常親切,因為落雨閣寒,就起火給阮接待。
3
保羅 拾一捆柴,㧒落火,彼陣有一尾毒蛇因為火燒趖出來,纏佇伊的手。
4
當地的原住民看著彼尾蛇吊佇 保羅 的手裡,就講來講去:「此個人一定是殺人犯,雖然對海裡拾著命,天理無容允伊活。」
5
保羅 將彼尾蛇灑落火裡,攏無受傷。
6
許個人攏金金啲看伊的手會腫起來,抑是伊會忽然慄落去,死去抑𣍐。𪜶聽候真久,看伊攏無代誌,就顛倒想講伊是神明。
7
海嶼的頭目 部百流 有一塊地離彼所在無偌遠。伊歡迎阮佇遐住三日,真親切接待阮。
8
當時, 部百流 的老父患著熱病及赤痢,倒佇眠床。 保羅 入去,給伊按手祈禱,給伊醫好。
9
因為此個代誌,當地其他的病人嘛來,嘛攏得著醫好。
10
𪜶送阮真多禮物;阮欲開船的時,將阮需要的物件送到船頂互阮。
11
三月日後,阮坐對 亞歷山大 來,名叫做「雙生仔神」的船出發。此隻船抵佇此個島嶼過冬天。
12
阮佇 敘拉古 上岸,佇遐停留三日,
13
後來對遐開船到 利基翁 ,隔日有透南風,第二日就到 部丟利 。
14
阮佇遐抵著一寡兄弟姊妹,𪜶請阮及𪜶住一禮拜。後來阮來到 羅馬 。
15
羅馬 的兄弟姊妹聽著消息,就來 亞比烏 市及 三館 迎接。 保羅 見著𪜶就感謝上帝,閣較有勇氣。
16
阮到 羅馬 了後, 保羅 得著允准及顧守伊的兵另外住。
17
三日後, 保羅 請當地 猶太 人的領袖來。𪜶聚集的時,伊對𪜶講:「各位兄弟,我雖然無做違背同胞的代誌抑是祖先的規例,毋拘佇 耶路撒冷 受掠,送交互 羅馬 當局。
18
𪜶審問我,看我無犯著該死的罪,有想欲放我;
19
不過 猶太 人反對,我才姑不將對皇帝上訴;其實我無意思欲控告家己的同胞。
20
因為按呢,我才要求及恁見面,及恁談論。我是為著 以色列 人所向望彼位才受鐵鍊鍊啲。」
21
𪜶對伊講:「關係你的代誌,阮並無對 猶太 接著批信,嘛無兄弟來對阮報告,抑是講你的歹話。
22
不過阮愛聽你的見解,因為阮知恁此派的人佇逐所在互人反對。」
23
𪜶及 保羅 約定一日,到時有真多人來 保羅 住的所在。對早到暗, 保羅 為著上帝國做見證,引用 摩西 的律法及先知的冊勸𪜶信耶穌。
24
伊所講的話有人信,有人毋信。
25
𪜶中間的意見無一致;𪜶離開以前, 保羅 講此句話:「聖神託先知 以賽亞 對恁的祖先講了真著!
26
伊講: 你去給此個子民講: 恁聽閣聽嘛𣍐了解; 恁看閣看嘛𣍐看見。
27
因為此個子民的心已經鈍, 耳孔重, 目睭瞌。 若毋是按呢,𪜶的目睭會看見, 耳孔會聽見, 心會明白,會回心轉意, 我就給𪜶醫好。
28
「所以,恁著知,上帝此個拯救的信息已經傳互外邦人。𪜶會聽趁!」
29
30
保羅 住佇家己租的厝足足兩年久。來訪問的人,伊攏給𪜶接待。
31
伊好膽宣揚上帝國的信息,閣教示關係主耶穌基督的事,攏無受阻擋。
Chinese TTVH 2021
The Bible Society in Taiwan, 2021
:
保存笔记