Kana le sirbati dikhle e žigenia astardi pe lesko vast, von phenen jekh avreske: Čačes kado manuš si jekh kai mudarel, ke e kris či kamlias te mukel les te trail, pala ke vo sas skipime katar e maria.
Kudala žene ažiukerenas te dikhen les ke phukiol vai te perel tele mulo; numa, pala ke but ažiukerde, dikhle ke nai leske khanči dukh, von pařude pengo gindo ai phenen ke vo si jekh del.
O dad le Publiusosko sas atunči ande o than nasvalo, sas les tatimos ai nasvalimos ande o dji; gelo o Paul karing leste, řudjisardias, thodia pe leste le vast, ai sastiardias les.
Anda e Roma avile angla amende, ži ka o Bazar katar o Apius ai ka le Trin-Birturi, le phral kai ašunde ke dine duma pa amende. O Paul, kai dikhlias len, naisardias le Devles, ai lias zor.
Trin dies pala kudia, o Paul akhardias le mai bare Židovon; ai, kana von kjidinisaile, vo mothol lenge kakala vorbi: Manušale phralale. Kerdem khanči či pe o narodo či pe o zakono amare dadenge, thode man ande e temnitsa ande o Jerusalem ai dine ma ande le vast ka le Romanuri.
Von thodine leske jekh dies, ai but avile t'arakhen les kai bešel. O Paul phenel lenge pa e amperetsia le Devleski, sas marturo, ai rodelas, katar o zakono katar o Moše ai katar le profeturi, te sikavel lenge so si o Jesus. O divano gelo de diminiats ži riate.
Sar von žianastar čingarasa, o Paul mai mothol kakala vorbi: Si čačimasa ke o Svinto Duxo, kana dias duma tumare dadenge katar o profeto Esai, phendias:
Ke o ilo kadale narodosko areslo zuralo. Von zuriarde penge kana, ai von phandade penge jakha, ke te na dikhen penge jakhensa, ke te na ašunen penge kanensa, ke te na hatiaren ande pengo ilo, ke te na pařuven pe, ai ke me te na sastiarav le.