Den Piita aks im se, “Ananaiyas, ou kom yu mek Sietan tek kanchuol a yu an mek yu lai tu di Uoli Spirit? Yu kip bak som a di moni fi yuself, an kom a gwaan laik se yu a gi evriting?
Tel mi sopm, di lan a no did fi yu bifuo yu sel it? An afta yu sel it, di moni a did fi yu an yu kuda du eniting we yu did waahn fi du wid it. So wa mek yu tingk yu did afi lai? A no piipl yu lai tu, a Gad yu lai tu.”
Piita se tu ar se, “Mek di tuu a unu mek op unu main fi si ef unu kuda lai tu di Laad Spirit an no get ponish? Luk! Di man dem we beri yu ozban tan op a di duor, an dem a kom fi yu fi go beri yu tu.”
Kroud an kroud a piipl kom fram di toun dem roun Jeruusilem. Dem kyari dem sik piipl an piipl we diiman spirit did tek set pan kom a di apasl dem an aal a dem get beta.
Wen die lait dem go iina di yaad we Gad ous de, siem laik ou di ienjel did tel dem fi du, an staat tiich di piipl dem. Wen di liida fi di priis dem an im falara dem riich, im kaal tugeda aal a di Juu liida dem fi wan miitn. Den im sen som suoja tu di prizn fi kyari di apasl dem kom infronta dem.
Im se tu dem se, “Wi neva aada unu chrang chrang se unu no fi tiich nobadi bout di sitn dem we da man de niem Jiizas se unu fi tiich? Bot luk wa unu du. Unu ful op Jeruusilem wid di sitn dem we im tiich. An no onggl dat, unu chrai put fi’im blod pan wi an dem an se a wi kil im.”
Gad big op Jiizas an put im fi sidong a im rait an. Im mek Jiizas wan liida an di wan we a-go siev piipl so dat di Izrel piipl wuda get di chaans fi ton we fram dem sin, shuo se dem sari, an get dem sin paadn.
Bot wan Farisii niem Gyamieliyel, wan a di Laa tiicha dem we evribadi rispek, tan op iina di miitn infronta aal a di liida dem an aada dem fi put di apasl dem outa duor likl bit.
Kopl ier bak wan man niem Tuodos shuo op an staat tel piipl bout ou im a wan powaful liida an bout fuo onjrid man did jain op wid im. Bot dem kil im, an aal a im falara dem skyata aal uova di plies an a so dat did don.
Afta dat wen di govament did a rait dong evribadi niem fi si umoch piipl did iina di konchri, Juudas we kom fram Gyalalii go gens di govament an get som piipl fi jain op wid im. Dem kil im an aal a im falara dem skyata tu.
So ier mi, wen it kom tu dem man ya lef dem, no du notn fi ort dem. Kaaz ef di sitn we dem plan an di wok we dem a du, ef a man kom op wid dem, it naa kom tu notn.
an dem kaal iin di apasl dem an mek di suoja dem biit dem. Den dem aada dem se, “No taak tu di piipl an yuuz Jiizas niem eva agen!” Afta dat dem let dem go.