|
| 1 |
|
| Hanaaniya yinannihu mittu manchi galtesi Sephiira ledo baatto hiri. |
|
| 2 |
|
| Galtesino affanna baatto hirino woxe gama gatise gama masse soqqamaasinete uyi. |
|
| 3 |
|
| Pheexiroosi kayinni, «Hanaaniya, Qullaawa Ayyaana dogattonna baatto hirootto woxe gama gatisi'ratto gede Sheexaanu wodanikki giddora mayira ei? |
|
| 4 |
|
| Hirattora albaanni baatto diatete? Hirittohu gedensaannino woxu diateho? Wodanikkinni konne coye mayira heditto? Magano ikkinnina manna didogootto» yii. |
|
| 5 |
|
| Hanaaniya tenne macciishshanni hee'renni uwe reyi. Konne coye macciishshi manni baalu lowo geeshsha waajji. |
|
| 6 |
|
| Wedellu ka'e reeshsha kafante massite madaartu. |
|
| 7 |
|
| Sase saate gedensaanni Hanaaniya galte ikkinore affukkinni hakkiichira ka'e daggu. |
|
| 8 |
|
| Pheexiroosino, «Hanni kulie, baatto'ne hirtinoonni woxi kageeshshaatilla» yee xa'mise. Iseno, «Ee! Geeshshiralla hirroommo» yitu. |
|
| 9 |
|
| Pheexiroosi, «Maganu Ayyaana jifate mayira sumuu yitini? Kuneeti, galtekki madaare higino manni nafara no. Ateno masse madaarannohe» yiise. |
|
| 10 |
|
| Iseno hakkawoyintenni lekkasi mule ubbe reyitu. Wedellu minira e'u yannara reyite noota affe, haadhe massite galtese waamma mule madaartuse. |
|
| 11 |
|
| Beetekiristaane gudisamantinna konne coye macciishshi manni baalu lowo geeshsha waajji. |
|
| 12 |
|
| Soqqamaasine mannu mereero lowo dhaggenna maalale loossu. Baalunku mitto wodana ikkite Selemooni Daasira gamba yitanno. |
|
| 13 |
|
| Mannu lowo geeshsha ayirrisinonsaha ikkiro nafa, insa widire ikkitinokkiri giddonni ledonsa hee'rate seyatinohu mittu nafa dino. |
|
| 14 |
|
| Ikkollana Mooticha ammantinoriti labballunna meentu kiiro ledde ledde batidhu. |
|
| 15 |
|
| Lowo manni dhiwamino manna daallasunninna reretenni haa're masse doogote gama woranno. Hatto assitannohu Pheexiroosi hakkaanni hige sa"anno woyite caalisi nafa aanaho uwansara hasidheeti. |
|
| 16 |
|
| Mannu Yerusaalamete gaangaawira noo katammanni dhiwamaanonna bushu ayyaani qarrisannore abbitu. Abbiniri baalunku hurtu. |
|
| 17 |
|
| Qeesootu roorrichinna isi ledo noori Saduqootu widire ikkitinori baalu hinaasse aanansa ka'u. |
|
| 18 |
|
| Soqqamaasineno amadde usuru minira eessitunsa. |
|
| 19 |
|
| Maganu sokkaasinchi kayinni hashsha usuru mini cufana fane fushshensa, |
|
| 20 |
|
| «Hadhine, Qullaawa Mine uurritine tenne haaro heeshsho sokka baala mannaho kulle!» yii. |
|
| 21 |
|
| Soqqamaasineno hajajante soodo Qullaawu Minira marte rosiissu. Hatte yannara qeesootu qarinna ledosi noori songote miillanna Yihudu geerri baalu mitteenni gamba yite, soqqamaasine usuru mininni fushshe abbanno gede manna sokku. |
|
| 22 |
|
| Usuru mine agartannori roorrooti kayinni usuru minira marte soqqamaasine hakko hoogge galagalte higge, |
|
| 23 |
|
| «Usuru mini waalchi cufame, agaraasineno xullichoho uurrite noore anfoommo. Usuru mine fanne la'neemmo woyite kayinni giddo noonku dino» yite kultu. |
|
| 24 |
|
| Qullaawu Mini agaraasine hajajaanchinna qeesootu roorrooti konne coye macciishshite, «Kuni maati ikka?» yite amaddannore hooggu. |
|
| 25 |
|
| Hatte yannara mittu manchi daye, «Usuru minira eessitini manni kuneeti Qullaawa Mine marte rosiissanni no» yii. |
|
| 26 |
|
| Hakkawoyintenni roorrichu ledosi loossannori ledo mare soqqamaasine haa're abbi. Abbitinonsahu wolqatenni ikkikkinni dogisiissanniiti. Hatto assitinohu, mannu kinnatenni ganannonke yite waajjitino daafiraati. |
|
| 27 |
|
| Abbite songote albaanni uurrissunsa. Qeesootu roorrichino, |
|
| 28 |
|
| «Yesuusi su'minni rosiissinannikki gede seekkine kulloommo'ne. Ki'ne kayinni kune Yerusaalame rosi'nenni wonshitinoonni. Kunni manchi reyora ninke xa'mammeemmo gede assitinankera hasidhinanni» yiinsa. |
|
| 29 |
|
| Pheexiroosinna ledosi soqqamaasine kayinni, «Mannaho hajajamantenni Maganoho hajajama hasiissannonke. |
|
| 30 |
|
| Annuwanke Magani ki'ne haqqu aana suttine shitini Yesuusa reyotenni kayisino. |
|
| 31 |
|
| Maganu Israeelete aagintaabbeenna cubbonsa agurara, Yesuusa Gashshaannanna Gatisaancho asse qiniitesiinni ayirrinyunni ofollanno gede assino. |
|
| 32 |
|
| Kunni coyira ninke naqaashshete. Maganu hajajantannosirira uyinohu Qullaawu Ayyaanino naqaashshete» yii. |
|
| 33 |
|
| Songote miilla konne coye macciishshite lowo geeshsha hanqite soqqamaasine shitara hasidhu. |
|
| 34 |
|
| Ikkollana mannu ayirrisannosihunna Seeru rosiisaancho ikkinohu Gemaaliyaali yinannihu mittu Farisootu widihu songote miili kae, soqqamaasine shiimare ka'a shiqqi assinanni gede hajaji. |
|
| 35 |
|
| Hakkunni gedensaanni songote miillara, «Israeelete manna! Kunni manni aana assitinannire layidhinanni asse. |
|
| 36 |
|
| Kunni albaanni Tewodaasi, ‹Ani jawaho› yee kaino. Shoole xibbe ikkanno manni isi ledo ma'le kaino. Ikkollana iso shinita miillasi billaallitino; hedonsano ba'ino. |
|
| 37 |
|
| Hakkunni gedensaanni manna kiirri diro Galiilunnihu Yihudi kae lowo manni ha'runsannosi gede assino. Iso shinita miillasi baala billaallitino. |
|
| 38 |
|
| Kunnira xa ani kunni manni aaninni ho'litinanni gedenna agurtinanni gede amaaleemmo'ne. Hedonsanna loosinsa mannunniha ikkinoro ba"anno. |
|
| 39 |
|
| Maganuwiinni dayino coye ikkiro kayinni insa huna didandiitinanni. Hakkiinnino sae, Maganu ledo giwantinanniha ikkanno» yii. Insano amaalesi adhitu. |
|
| 40 |
|
| Hakkunni gedensaanni soqqamaasine insawa woshshite lichetenni gansiisse, layinkita Yesuusi su'minni coyidhannokki gede hajajje agurtunsa. |
|
| 41 |
|
| Soqqamaasine kayinni Yesuusi su'mira yite shollinye adha hasiissannonsata egentino daafira, tashshi yaannansa songote albinni fulte hadhu. |
|
| 42 |
|
| Barru barrunkunni Qullaawa Minenna wole minnara Kiristoosi Yesuusire rosiisanna Dancha Duduwo kula diagurtino. |
|
|
|
|