त्या दिनस्मा जव शिष्यस्नी संख्या गैरी वाळाले लागणी, तव ग्रीक भाषा बोलणारा यहुदी विश्वासी आणि इब्री भाषा बोलणारा यहुदी विश्वासीस्ना विरुद्ध मा कुळकुळाले लागनात, कि दररोज धन व जेवण नि सेवकाई मा आमन्या विधवास्नी हालचाल नई लेवामा येत.
तव त्या बारा प्रेषितस्नी यरूशलेम शहर ना दुसरा विश्वासीस्ले आपला जोळे बलाईसन सांग, “आमी प्रेषितस्ले आपला टाईम परमेश्वर ना वचन सिखाळामा देवाले पायजे, नई कि खावाळा-पिवाळा नि सेवा करामा.
एनासाठे ओ भावूसहोण, आपला मधून सात प्रतिष्ठीत माणसस्ले ज्या पवित्र आत्मा आणि बुद्धी कण परिपूर्ण राहोत, निवाळी ल्या, कि आमी तेस्ले ह्या कामस्वर ठराई देवूत.
हय गोष्ट पुरी मंडळी ले चांगली वाटनी, आणि तेस्नी स्तेफन नाव ना एक माणुस ले जो विश्वास आणि पवित्र आत्मा कण परिपूर्ण होता, आणि फिलिप्प, प्रखर, नीकानोर, तीमोन, पार्मिना आणि अंतीयुकस वासी निकलाव ले जो यहुदी मत मा ईजायेल होता, निवाळी लीधा.
परमेश्वर ना वचन पसरत ग्या आणि यरूशलेम शहर मा शिष्यस्नी संख्या गैरी वाळत गी, यहुदी पुजारीस्ना एक मोठा समूह येशु ख्रिस्त मा विश्वास ना ह्या संदेश ले स्वीकार करना.
पण कईक लोकस्नी स्तेफन ना विरोध करणात. त्या प्रार्थना घर ना सदस्य होतात, जेले दासत्व-मुक्त सांगामा येस, त्या लोक कुरेने शहर, सिकंदरिया शहर मधून, किलकिया प्रांत आणि आशिया प्रांत मधून बी होतात. ह्या लोक स्तेफन संगे विवाद कराले लागनात.
एनावर तेस्नी दासत्व-मुक्त लोकस्ले स्तेफन ना विषय मा खोट बोलाले उकसाव ज्या सांगू लागनात, “आमी येले मोशे ना नियम आणि परमेश्वर ना विरुद्ध मा निंदा नि गोष्टी सांगतांना आयकेल शे.”
तेस्नी स्तेफन ना विरुद्ध मा लोकस्ले, पूर्वज लोकस्ले आणि मोशे ना नियमले शिकाळनारा शिक्षकस्ले उकसाव आणि त्या ईसन स्तेफन ले धरीसन महासभा ना समोर ली ग्यात.
तठे त्या खोटा साक्षीस्ले लईसन उभा करणात जेस्नी स्तेफन वर हवू आरोप लाव कि, “हवू माणुस ह्या पवित्र जागा आणि मोशे ना नियम ना विरुद्ध मा निंदा करान नई सोळत.