Kalandenw tora ka caya. Waati dɔ la, zuwifu minw bɔra yɔrɔ wɛrɛ, n'u be girɛkikan fɔ, olu tora ka tɔw kɔrɔfɔ k'u te to k'u mako don olu ka firiyamusow la kosɔbɛ dumuni tilantuma na loon o loon.
O kama balimaw, aw yɛrɛ ka mɔgɔ wolonwula woloma aw cɛma minw sɔɔn ka ɲi, ni hakili b'u fɛ, ni Nii Senuman. O la, anw bena dumuni tilanko don olu bolo.
O kuma nin diyara jama ye. O tuma na, u ye mɔgɔw woloma, olu tɔgɔw filɛ nin ye: Etiyɛni, min jigi tun be Ala kan kosɔbɛ Nii Senuman tun b'a fɛ, ni Filipu, ani Porokɔri, Nikanɔri ni Timɔn, ni Parimenasi, ani Nikola ka bɔ Antiyɔsi, min donna zuwifuya la.
O bɛɛ kama, kalanso min be wele ko Jɔnhɔrɔnyaninw ka kalanso, o mɔgɔ dɔw nana sɔsɔli daminɛ ni Etiyɛni ye. Sirɛnikaw ni Alɛkisandirikaw ni Silisikaw, ani Azikaw fana niin tun b'o la.