Kay wala sila makahangop kon paano batunon sang Dios ang mga tawo, sa baylo nagahimuhimo sila sang ila kaugalingon nga paagi. Gani, wala sila magpasakop sa pamaagi sang Dios sa pagbaton sang mga tawo.
Amo ini ang ginsulat ni Moises nahanungod sa pagbaton sang Dios sa mga tawo paagi sa pagtuman sang Kasugoan: “Ang bisan sin-o nga nagatuman sang mga mando sang Kasugoan magakabuhi.”
Pero amo ini ang ginsiling sang kasulatan nahanungod sa pagbaton sang Dios sa mga tawo paagi sa pagtuo: “Indi ka magsiling sa imo kaugalingon, Sin-o bala ang mapalangit?” (kon sayuron, sa pagdala kay Cristo sa idalom).
Amo ini ang ginasiling sang kasulatan: “Ang pulong sang Dios malapit na sa inyo, sa inyo mga bibig kag sa inyo tagipusoon”—kon sayuron, ang pulong sang pagtuo nga amon ginawali.
Ini para sa tanan, tungod kay wala sing kinatuhay ang mga Judio sa mga Hentil. Ang Dios amo man ang Ginoo sang tanan, kag nagahatag sia sing bugana nga kaayuhan sa tanan nga nagapanawag sa iya.
Pero paano bala ang pagpanawag nila sa iya, kon wala sila magtuo? Kag paano bala ang pagtuo nila sa iya, kon wala sila makabati sang pulong sang Dios? Kag paano bala ang pagkabati nila, kon wala mawali sa ila ang pulong sang Dios?
Kag paano bala ang pagwali sang pulong sang Dios, kon wala mapadala ang mga manugwali? Ang kasulatan nagasiling, “Daw ano katahom tulokon ang pag-abot sang mga manugwali sang maayong balita!”
Pero mamangkot ako: Matuod bala nga wala sila makabati sang pulong sang Dios? Huo, nakabati gid sila! Kay ang kasulatan nagasiling: “Ang ila mga tingog nabatian sa bug-os nga duta, ang ila mga pulong nakalambot sa mga ukbong sang kalibutan.”
Liwat mamangkot ako: Wala bala makahangop ang katawhan sang Israel? Si Moises mismo, ang manughambal sang Dios, amo ang una nga nagsabat sini: “Paimunon ko kamo sa mga tawo nga indi matuod nga pungsod, paakigon ko kamo sa isa ka pungsod nga ang iya mga tawo buangbuang.”
Kag si Isaias may labi pa nga kaisog sa iya pagsiling: “Nasapwan ako sang mga wala nagapangita sa akon, nagpakilala ako sa mga wala nagapamangkot nahanungod sa akon.”