L pɑɑk, n luon k n boi k lɑɑn i duki ɑ Yennu yet u mɔnŋ niib ɑmi? Aɑi, u k yet’b kɑɑ. N mɔnŋ tie Islɑɑel nilɔ e, k tie Ablɑɑhɑɑnm yɑɑbuonn, k nyii Bensɑɑmen nɑɑkuuk ni.
Yennu i lukt niib, u ninkpɑbɑɔnŋ pɑɑk e, k u lukt’b, k l k tie b tuonɑ pɑɑk kɑɑ. Yennu i bo i lukt niib b tuonɑ pɑɑk i e, u ninkpɑbɑɔnŋ nɑ bo kii tie bɑlmɔni ninkpɑbɑɔnŋ kɑɑ.
Tɔn, t sɑɑ yet ɑ biɑ? L wɑnt nɑn Islɑɑeltieb k lɑ bɑɑ luon lin nbɑ. Bin nbɑ k Yennu lukt’b nɑ kuukuɑ nɑ lɑ’l, ŋɑɑn bin nbɑ biɑl nɑ tien tubkɑngbɑtɑ dɑnm e.
N boi biɑk k lɑɑn Islɑɑeltieb din gbiɑt k bɑɑ k ji k fit fiil ɑmi? Aɑi, l k tie nnɑ kɑɑ. Bɑɑ tun biit nɑ pɑɑk, k Yennu fiel bin nbɑ k tie *Suifnbɑ nɑ. Yennu tun nnɑ ɑ ŋɑnm Suifnbɑ nɑ i mɔk *funfunn bin nbɑ k tie Suifnbɑ nɑ pɑɑk.
L i tie k Suifnbɑ biit te k tingbounŋ tieb lɑ piisn, k bɑɑ k tien yɑdɑ nɑ te k bin nbɑ k tie Suifnbɑ lɑ bonŋɑnn, nlee k bonŋɑnn kɑn yɑbt *dulnyɑ ni l i tie k b ŋmɑt k lebt b binbenŋ i?
Yennu nbɑ din yet Suifnbɑ nɑ, l din te k l ji mɑn tingbounŋ nɑ niib nɑn Yennu sinsuuk ni. Yennu i ŋmɑnt k gɑɑl’b k b tie u niib, l ji sii tie nlee? L set sii tie bɑlmɔni e nɑn bi fiil kuun ni k jen mɑnfuol ni wɑɑ.
L i tie k b buun pɑɑnu yon, k bɔkt sinsinn yɑl k tien pɑɑnu k l tie Yennu yɑl, lin nbɑ ten nɑ mun biɑ tie Yennu yɑl e. L i tie k tiik jiinɑ tie Yennu yɑl i e, l yiini nɑ mun biɑ tie u yɑl e.
Suifnbɑ nɑ tie nɑn ŋɑɑk ni tiik nbɑ k b yi oliifie nbɑ ŋɑn nɑ e, k b kɔnn tiik nɑ yiinsiɑ. Fin nbɑ k tie Suif nɑ, ɑ tie nɑn muuk ni oliifie yiinu nɑ e k b tukn’ɑ b yiɑl ni ŋɑɑk ni oliifie pɑɑk, k mɔtɑɑnɑ ɑ gɑɑn bonŋɑnn nbɑ nyi ŋɑɑk ni oliifie nɑ jiinɑ nɑ ni e.
L set tie mɔni e. Bɑɑ k tien yɑdɑ nɑ pɑɑk e k b kɔnn’b, k fin nbɑ tien yɑdɑ nɑ pɑɑk e k b jii’ɑ tukn’ɑ l pɑɑk. Ŋɑnn, ɑ ji dɑɑ mɔk pɑlbifɑɑnt dudukt l pɑɑk, ŋɑɑn kii mɔk jɑŋmɑɑni.
Gotl Yennu nbɑ mɔk bulcint ŋɑɑn biɑ mɔk ninkuoni biɑnŋ nbɑ. U mɔk ninkuoni k tul bin nbɑ bɑɑ nɑ, ŋɑɑn u wɑnn’ɑ u bulcint. Ŋɑɑn l kpɑɑ tɑlɑs k ɑ biɑl u bulcint ni. Nnɑ i kɑɑ, u sɑɑ kɔnn’ɑ nɑn yiinu nɑ e.
Fin nbɑ k tie Suif nɑ tie nɑn muuk ni oliifie yiinu nɑ e, k Yennu kɔnn’l k tukn nɑn ŋɑɑk ni oliifie nɑ, ŋɑɑn b tuu k tie nnɑ. L k pɑɑl k wun jii yiini nbɑ k u kɔnn ŋɑɑk ni oliifie nɑ ni, k biɑ tukn nɑn l mɔnŋ oliifie nɑ biɑk.
N nɑɑ wɑɑs, n luon k yin bɑnn wuol ni lɑbɑɑl, ɑ i dɑɑ duki nɑn i tie yɑndɑnm e. L tie ɑ Suifnbɑ siɑb tie kɑngbɑtɑ e, k l sii be nnɑ e k tɑn bɑɑl yuo nbɑ k bin nbɑ k tie Suifnbɑ kul nbɑ k Yennu lukt’b nɑ, bin tɑn tien Yiesu yɑb.
Nnɑ e k Islɑɑel kul sɑɑ lɑ fielu, nɑn lɑɑ diɑn Yennu lolkpel kɑdɑɑɔk ni ɑ Yennu yet ɑ: «Fietuɑ sɑɑ nyi *Siiɔn duo ni e, k bɑɑl k tɑn nyinn mɔyetuk Sɑɑkɔb yɑɑbuonɑ sinsuuk ni.
L i tie k t got Suifnbɑ nbɑ yet Yiesu lɑbɑmɑnn bɑnnu nbɑ, b tie Yennu dɑtɑi, ɑ lin bɑɑl nɑn bonŋɑnn k tul’i. Ŋɑɑn l i tie k t biɑ got Yennu nbɑ din lukt’b bɑnnu nbɑ, b tie bin nbɑ k Yennu luon’m, b yejɑnm pɑɑk e,