Me puchau akana: ¿Sai avelpe kai o Del mukla pe foro kai isto vou esvirisarda? ¡Gua nasti avelpe! Isto me sem israelita katar e vicha e Abraameki katar o Benjamin.
O Del ni mukla pe foro kai vou esvirisarda. ¿Ni llanen so phenel katar o Elias ando Pisipe kana dosarda e foro katar o Israel angla o Del ta phenda gia:
Akana puchau ¿Sai avelpe kai e judiura peletar te na usten pale? ¡Gua nasti avelpe! Cheres lende kai ni kandie avilo o braduipe golenge kai inai judiura, ta gava ka cherel te joliaon e judiura.
Ta soke von ni kandie gua barvarda e sueto, ta lengo peradipe pomozisarda e llenen kai inai judiura, ¡akana mislin tumen savo baro barvalipe ka avel kana o Del ka lel sa e judionen!
A soke o Del ni kamla e judionen gua cherda te sai phagol e joli maskar o Del ta o sueto, ¿a kana o Del ka lel e judionen? ¡gua ka avel zivoto lenge kai sea mule!
Kana vareko del e Devle o purvo marrno kai cherda, ondaka i ogola marrne kai achen si e Devleke. Te si dine e Devleke e zile katar iek kas, ondaka i leke krangura si e Devleke.
Akana si de istina kai nesave krangura chindile katar o kas e maslinkengo, ta kai tu kai san iek maslinka thodi pe lengo than ta san istardo po kas e maslinkako, ta akana tu le o zivoto katar e zile gole kasteke.
A tumen na mislin kai sen mai lache neko e krangura e chachune e maslinkake. A te fali, sai len katar gua. Thoven sama kai e zile den tumen o zivoto a na tumen le.
Dik gia lacho si o Del ta gia orta vou avila golenchar kai peletar, a tuia avilo posteno. Goleke morabi te zivi sar vou mangel, soke te na cherea gia i tu ka ave chindo.
Soke tu kai sana iek vosako kas e maslinkako, chinde tut ta thode tut po lacho kas e maslinkako. So mai but e judiura kai si e chachune krangura katar o lacho kas e maslinkako, pale ka thovel len isto pe lengo kas e maslinkako.
Phlalalen, mangav te llanen gava chachipe gurudino e Devleko, ta gia te na istardon: nesave israelitura zuraile a gua si samo llik kana ka cherdon katar lengo foro sa gola kai inai israelitura.
Kana gava ka avelpe, sa o Israel ka resel te avel braduime, soke o Pisipe phenel gia: O Braduimari ka avel katar o Sion ta ka duriavel o bilachipe katar o Jakob.
A cheres e lachi viasta, e israelitura si sargo dusmanura e Devleke. Gua cherel le pala tumende te sai i tumen pachan ande lachi viasta, o Del llik akana volil e judionen, soke esvirisarda katar lengi vicha te cherel po foro.