Apo cincino funa ndibvundze: Kodi nkhulongera kuti Mulungu aikhonda mbumba yace? Nkhabe citika! Ine ene ndine muizarayeli, dzindza ya Abharaamu, nkhonde ya Bhenjamini.
Ngakhala pyacitika na thangwi ya kukoma ntima kwa Mulungu, pinacitikabve na thangwi ya mabasa tayu. Mbapidakhala ndi na mabasa, kukoma ntima kwa Mulungu mbukudakhalabve kukoma ntima tayu.
Mbwenye ngakhala kudodomeka kwawo ndi mpfuma kuna dziko, pontho kupolola kwawo ndi mpfuma kuna ale adakhonda kukhala madjuda, ndiye tani n'dzidzi wawo ungakwana!
Ngakhala phindi ya nkate wa pyakudya pyakutoma pya m'munda waceneswa, na nkate ene onsene waceneswambo. Ngakhala n'chici waceneswa, na nthawi zace zene zaceneswambo.
Ngakhala nthawi zinango zagwandiwa, iwembo ninga muti wa mulivera wa n'tsanga wachekwambo pakati pa nthawi zinango, cincino mbumwambo pabodzi pene nthombvu zinabuluka ku n'chici wa muti wa mulivera wa m'mudzi,
Onani mphapo udidi wa Mulungu na kukala ntima kwace. Asakala ntima na ale adagwa, mbwenye asakoma ntima na iwe, male unganyanya kunyindira kukoma ntima kwace. Pezi pyene, na iwe ene unadza kagwandiwambo.
Thangwi ngakhala iwe wagwandiwa pa muti wa mulivera wa n'tsanga, mbubuluswa padamera iwe mbupfekererwa pa muti wa mulivera wa m'mudzi, pinthu pyakukhonda kucitika, ndiye tani kuna nthawi za penepo! Zinapfekererwa pontho pa muti ubodzi-bodzi.
Na tenepo, mbumba yonsene ya Izarayeli inapulumuswa, ninga mudalemberwa ipyo m'Bukhu ya Mulungu kuti: “Mpulumusi anabuluka ku Siyau, mbadza kabulusa kuipa konsene kwa dzindza ya Djakobo.