Kengisit tokona nabo ayong esi kona, nakolong adakarotor Ngiyaudi a, apot tomunyar a? Mam jik! Aanyunete ngibukui lu nyerai Ngiyaudi ayuuno ani asecheta Ngiyaudi. Sodi kirakarea Ngiyaudi etereku alobukui alu nyerai Ngiyaudi.
Kesuruori tokona ayong esi ngibukui lu nyirai Ngiyaudi, ani aringa ayong arai lo kamearitae lobukui lu nyerai Ngiyaudi, alakara ayong noi kotere etich kang.
Kainyo ani kerai ni angerio Akuj Ngiyaudi ngesi achamunotor ngibukui lu nyerai Ngiyaudi ka Akuj, ikokini ai na echamunea Akuj kesi? Ikokinete ngikatoak lu ayarut!
Ani kisiaun amugati epewae nakinae Akuj, eliwor tani amugati daang akeng. Ani kelemun ngaten a ekitoe na eya tooma ngalup nakinae Akuj, eliwor tani ngaten na alokidiama dang ngaka a Akuj.
Ani kechiatar epewae a ngaten a ekitoe a akimiet, lo itakinit itwaan mana, nakaneni tolemunae ateni a ekitoe a akimiet lo erai eka moding, tokodakinae nikeng, ikote esi ngibukui lu nyirai Ngiyaudi ekitoe a akimiet, lo erai eka moding. Ianyut tokona esi dang akiyar naajokon a Etau a Akuj, na erai aka Ngiyaudi.
Nakaneni nyejoikinit tokona esi imenyete lu ekokis ngaten na achiatar, nyo tokona inisatar esi? Ikote esi ateni na alokidiama, nyigangito esi ngaten na alokwap, ngaten na alokwap kesi kigangito esi.
Eraakasi nguna iteni! Ekokinete kesi ngaten na achiatario ani peanupeta, sodi kidong iyong neni ani inupitor. Nakaneni wara nyiinis kotere nguna, ejoikinit iemi.
Ikote esi ngibukui lu nyirai Ngiyaudi ateni a ekitoe a akimiet alo alomoding, lo echiatario, sodi toropakinae lokitoe eche a akimiet itakinitae mana, losek nyimorikina ka ngesi. Ikote Ngiyaudi ekitoe lo etakinitae ngolo, nakaneni ebeben ani a Akuj akimorikin nabo ngaten na echiatara nu ka ekitoe lo erai ekech.
Ngikaitotoi kang, eya ngakiro namunonoe na eraakasi ngaka iteni na asaki ayong esi toyena sodi tojongoto akitam atamar kori iosok esi. Meere akichananu a Ngiyaudi aka jik, emini tanang ngirwa lu itemokinor ekimar a ngibukui alu nyerai Ngiyaudi alu enupete ngakiro a Akuj.
Kona angerioto Ngiyaudi Ngakiro Naajokak, aliworosi kesi ngimoe a Akuj kotere esi ngibukui lu nyirai Ngiyaudi. Nakaneni kotere nikolong aseunea kesi Akuj, eraakasi kesi ngipaalon a Akuj kotere ta apakech.