Chavâta unawh saih u, Khazohpa ngiachhiena vâta, atheihna hrohpa nata pathaihpa nata a pyh tlâh châ awpa ta, nama pôhpa cha Khazohpa lâ hlâ awpa ta ei châ haw ei. Cha cha thlahpa ta Khazohpa namâ chhynazie awpa a châ.
He khizaw ryhpa hawhna heta y leipa u la, nama palôh pathiehpa ta tlao anano lymâ teh u. Chatanachata Khazohpa khopa cha khâpa ma a châ tahpa pahno thei aw ei chi ta, hmo phapa a pyh tlâhpa nata phapakipa cha nama pahno thei aw.
Nama hry liata chyhsa ahy hmahta a châna dopa hlâta a sâh viapa ta a pachâ leipa sala, Khazohpa ta chyhsa to hnohta ngiapâna a piepa rakhapa lymâ hawhta, a châna dopa a pahno thai awpa ta, Khazohpa ta ngiachhiena eina piepa zawhzi ta ei cha chho ei.
pasyutuhpa ta pasyuna bie reih sala, hmopietuhpa ta riapha ngaitapa ta pie sala, ryureituhpa ta tiamapa ta ryureih sala, ngiachhiena rai hriatuhpa ta a ly ngaitapa ta hria mawh sy.
Kho ngaitapa saih u, nama phuh a la leipa u la, Khazohpa pathiiana tlei hri teh u. “Phuh cha keima la awpa châ ta, kei ta viari ei thô aw, Abeipa ta a tah,” tahpa ta ropa a châ.
Chavâta, “Na chariahpa a nodi khiahta cha, nie awpa pie la, a dâhphi khiahta cha, do awpa pie mah y. Cha hawhta na tao khiahta cha, a luh chô liata meiia beih na khaihpa a châ aw.”