Dinzuɣu m mabihi, Naawuni ni zɔn ya nambɔɣu zuɣu, n kpamdi ya jaande ni yi zaŋ yi niŋgbuna kaman sar’ nɛɔŋ din be kasi ka tiɣiri Naawuni nini la n-ti ŋun’ Naawuni. Dina n-nyɛ jɛmbu maŋli Naawuni sani.
Di chɛliya ka yi bebu be kaman dunia ŋɔ nim’ bebu, amaa chɛliya ka yi bebu zaa taɣi, yi tɛha ni leei tɛhi’ pala la zuɣu, ka lala chɛ ka yi tooi baŋ Naawuni yubu din nyɛ din viɛli mini din tiɣir’ o nini ni din be tibi la.
Naawuni ni niŋ alibarika shɛli niŋ n ni zuɣu, n kpamdi yi zaa jaande ni yi ni so di tɛhi ni omaŋmaŋ’ bebu gari o bebu ni nyɛ shɛm, amaa lee tɛhimiyala nimmoo tɛha, ka zahimmiya yimaŋa viɛnyɛliŋga kaman Naawuni ni ti sokam yɛda shɛm.
Naawuni ni ti ti pin’ kɔŋkɔb’ shɛŋa la zuɣu, chɛliya ka ti zaŋ li tum tuma ŋun’ Naawuni ni niŋ alibarika shɛli niŋ ti ni la zuɣu: Naawuni ni ti ti pin’ shɛli yi nyɛla anabitali yɛtɔɣa tɔɣisibu, chɛliya ka ti tɔɣisi li kaman ti yɛda ni nyɛ shɛm;
ka ŋun saɣisiri niriba, ŋun’ saɣisim’ ba; ka ŋun tɔhiri tɔto, ŋun’ tɔhimi ni o suhu zaa; ka ŋun ʒe fukumsi zaashee, ŋun’ tummi viɛnyɛliŋga; ka ŋun mi niŋdi nirilim, ŋun’ niŋmi li ni suhupiɛlli.
N yurinima, di bɔhiya biɛri yi toli, amaa chɛliya biɛri bɔhibu tila Naawuni ŋun su tibidarigibo yɛla ŋɔ, dama di sabiya ni ti Duuma yɛliya, “Mani n-su biɛri bɔhibu, m mi shiri ni bɔhi biɛri labisi.”