Sa anda kudia kudo kai ninkerel-pe pe le rai bare ninkerel-pe pe e poronka le Devleski kai vo thodias, ai kudala kai ninkeren pe len jekh strafo pe pende.
Ke vo kerel butji le Devleski te keres o mištimos. Numa te keresa o nasulimos, trubul te daras ke nai intaino ke si les e xanřo. O rai baro si sluga le Devleski pe tjiro mištimos. Numa te keresa tu nasul, dara; ke nai intaino ke vo si les e xanřo, si sluga le Devleski te kerel te pokjinen kudala kai keren o nasulimos.
Čačes, le poronki: Tu či keresa kurvetsia, tu či mudaresa, tu či čoresa, tu či rodesa te les so si avresko, ai si te aven aver poronki, si ande kadia vorba: T'avel tuke drago tjiro vortako sar san drago tuke.
Kudia diela si bari ke tume žianen ande če vramia ame sam: Si o časo t'ušten anda e lindri, ke akana o skipimos si mai paše paša amende akana ke sar patiaiam pe e mai angluno data.
Phiras ande o čačimos, sar ande o pherdo dies, dur katar o but xamos ai katar o but matimos, katar o lažiamos ai katar e kurvetsia, katar le čingaria ai katar e žaluzia.