×

పవిత్తర్ బైబిల్ 2025

Romans 14

1
విశ్వాసేమా కమ్ జోరేవాళేన ఢైఁ కర్లో పణ్, ఓర్ అన్మానేన కాడేన ఓతీ వాద్ వివాద్ కరోమత్.
2
ఏక్ ఆద్మీ విశ్వాసేతి కాఁయిఁ వతోయి ఖాయేజా కన్ కచ, పణ్ ఉజ్జేకో విశ్వాసేర్ కార్ణే కమ్జోరేవాళో తొరి తర్కారీజ్ ఖారోచ.
3
కుణ్సీతీ ఖాసకెవాళో సే ఖాయెనీ జేన హల్కో న పాడ్ణో. తొరి తర్కారీజ్ ఖాయెవాళో సే ఖాయెవాళేన నేవొ నకర్ణో, కసేన కతో, దేవ్ ఓన ఢైఁ కర్లీదోచ.
4
ఉజ్జేకేర్ సేవకేన నేవ్ కరేన తూఁ కూణ్? ఏక్ హూబ్రేరో క, పడ్జాయెరో ఓర్ ఖాస్ మాలకేరో కామజ్. ఊ హూబ్రేసకచ, కసనకతో ప్రభూ ఓన హూబ్ రకాడేన శక్తిమాన్ వేన్ ఛ.
5
ఏక్ దాడో ఉజ్జేక్ దాడేతీ ఆచ్చో కన్ ఏక్ కేలచ; ఉజ్జేకొ సేదాడ్ ఆచజ్ కన్ కేలచ. హర్యేక్ ఓర్ ఊజ్ ఓర్ దల్లేన ఘట్ కర్లేణో.
6
కుణ్సీ దాడోవతోయి ఆచ్చోజ్ కన్ కేలేవాళో ప్రభూర్ వాసజ్ హనూకేలచ. కుణ్సీతీ ఖాయెవాళో ప్రభూన ధన్యవాదన్ స్తుతి కర్రోచ జేతి ప్రభూర్ సారూజ్ ఖారోచ, ఖాయేనిజకో సదా ప్రభూర్ సారూజ్ ఖావనజూఁ రేన్, దేవేన ధన్యవాదన్ స్తుతీ కర్రోచ.
7
అపణ్ మా కుణీ సదా ఓర్ వాసజ్ బంచేని, కుణీ సదా ఓర్ వాసజ్ మరేనీ.
8
అపణ్ బంచాఁతోయి ప్రభూర్ వాసజ్ బంచాంచాఁ. అపణ్ మర్జావాంతోయి సదా ప్రభూర్ వాసజ్ మర్జావాంచాఁ. జేతి అపణ్ బంచన్ రాంతోయి, మర్జావాఁతోయి, అపణ్ ప్రభూర్వాళ్ వేన్ ఛాఁ.
9
కసేన కతో, బంచ్రేజేనన్ మర్గేజేన ప్రభూవేన్ రేనజ్తో కాఁయిఁ క్రీస్తు మరన్ ఫరన్ బంచో.
10
హనువతో తూఁ తార్ భాయిన కసెన నేవొ కరేచీ.? తూఁకసెన తార్ భాయిన హల్కో కరేచీ? అపణ్ సే దేవేర్ న్యాయేర్ తక్తార్ ముణాంగ హుబ్రాంఛాఁ.
11
కసెనకతో గ్రంథేమా, మార్ జీవేర్ సోగన్, హర్యేకేర్ గోడీ మార్ ముణాంగ నవచ. హర్యేక్ జీబ్ సదా దేవేన స్తుతీ కరచ కన్ ప్రభూ కేరోచ కన్ లకన్ ఛ.
12
జేతి అపణేమా హర్యేక్ ఓర్ బారేమా దేవేన లేకో వతాయేర్ ఛ.
13
జేతి అపణ్ ఏకేన ఏక్ నేవో న కరజూఁ రాఁ. అత్రాజ్ కోని, అపణ్ భాయి ఆకడ్జావ నజూఁన్, ఆడే భాటార్నాఁయి నరేణో కన్ తమ్ ఘట్ కర్లో.
14
అసల్ దేకతో కుణ్సీ చీజ్ ఖరాప్ కొనికన్ మ యేసు క్రీస్తూర్వడీ ఘట్ విశ్వాస్ కర్రోంచుఁ. పణ్ ఏక్ ఆద్మీ ఏక్ కుణ్సితి ఖరాప్ కన్ కేలతో, ఓన ఊ ఖరాపజ్.
15
తార్ ఖోరాకీర్ బారేమా తార్ భాయి దుఖ్ పావతో, తూఁ ఉజ్జీ ప్రేమేతీ చాలే వాళో కొని. క్రీస్తు కేర్ వాస మరోకో, ఓన తార్ ఖొరాకీర్ కార్ణే నాష్ కర్ మత్.
16
తమేన ఛజకో ఆచ్చో చీజ్ దూషణేర్ పాల్ వేదో మత్.
17
కసెనకతో దేవేర్ రాజ్ ఖాయేరోన్ పియేరొ కొని పణ్, పవిత్తర్ ఆత్మా దజకో నియతన్, శాంతీన్, ఆనంద్ వేన్ ఛ.
18
ఏ వాతేర్వడి క్రీస్తూర్ సేవకరేవాళో దేవేన ఖాతర్ వేన్, మన్క్యార్ నంజరేమా సదా ఛాజజుఁ రచ.
19
జేతి అపణ్ సమాధాన్ దజకోన్, ఏకేన ఏక్ భాలాయి కరేర్ కామ్ కరేన కోశీస్ కరాఁ.
20
ఖోరాకీర్ కార్ణే దేవేర్ కామేన నాశ్ కరోమత్. సే తరీకార్ చీజే పవిత్తరజ్, పణ్ అన్మానేతి ఖావజేన ఊ దోషజ్.
21
మాస్ ఖాయేర్ వతోయిక, అంగూరేర్ రస్ పీయేర్ వతోయి తార్ భాయిన హట్కజూఁ కర జకో అసో కుణ్సీ వతోయి ఓనఛోడ్దేరో ఆచ్చో.
22
తోన ఛజకో విశ్వాస్ దేవేర్ సమ్నక్ తార్ తూఁ సమోర్ రకాల్డ; ఊ ఆచ్చో కన్ కేలజేర్వడీ ఓర్ ఊజ్ నేవో కర్లేవాళో నసీబార్.
23
పణ్ అన్మాన్ కరేవాళో విశ్వాస్ నరజూఁ అన్మానేతి ఖావజేతి, దోషి కన్ నేవో పావచ. విశ్వాసేర్వడీ కొనిజకో కాఁయిఁ కో, ఊజ్ పాప్
Lambadi Bible 2025
2025, The Bible Society of India
:
Save Notes