Ng'ulu lu enyemete ng'ini ibore mam akitamamuute ng'ulu lu mam kenyemete ng'ini ibore. Ng'ulu de lu inyemete edia bon mam atubonokin ng'ulu lu enyemete iboro kere, naarai acamu Akuju kesi.
Itunenete itung'a ice ebe apaaran mutan ejokuna noi akilanya apaarasia nuce. Itunenete ice ebe apaarasia kere eputosi. Ng'ini itwan kotupu nu aseutu adama keng'.
Kijarete oni, ijarete oni kanuka Lokapolon. Bobo kitwakata oni, itwakate oni kanuka Lokapolon. Kanuka ng'unu, atikere kijarata oni kere de kitwakate oni, iraito oni luka Lokapolon.
Kanuka ng'un, osi lu inyemete edia bon inyo itubonokinata osi luce? Osi de lu inyemete ng'ini iboro, inyo itamamuutetere osi lukeyuunak luce? Oni kere ibuuto akigwo koking'aren ka Akuju kotubonok nesi oni.
Kitakadik ijo onaci kon kere kinac kon kanuka inyamata kalu inyemi ijo, mam ijo kisomae nuka amina. Mam acamakin inyamata lu inyemi ijo ibirorete itwan ni abu Kristo kotwana kanu keng'!
Ibore ni ederi akisomakin erait aking'ere akinyama akiring', mam akimata ebino, kere de mam asoma ibore kere ni idupori onaci kon kere kinaci kon ibiror.
Koricaki akiyuun kon ikamuuti iboro lu, koraite kiding' kon bon kiton Akuju. Elakara ng'ulu lu mam kaanyuto ebe isomato kesi arokusio na isomata kesi ibore ni iteete kesi ebe edolit!
Konye kibuwonokinete kesi kuju ka iboro kalu enyemete kesi, etubokini Akuju kesi na enyemiata kesi, naarai asomisio kes mam kecamara ka akiyuun. Bobo ibore kere ni mam kecamara ka akiyuun erait aronus.