Kita nga mga malig-on sa pagtuo dapat magbulig sa mga maluya sa pagpas-an sang ila mga kabug-atan. Indi lang kita maghimo sang makapahalipay sang aton kaugalingon,
Kay si Cristo wala maglipay sang iya kaugalingon, sa baylo subong sang ginasiling sang kasulatan, “Ang mga pasipala sang mga nagpasipala sa imo nagtupa sa akon.”
Kay ang tanan nga nasulat sa mga Kasulatan ginsulat sa pagtudlo sa aton, agod nga paagi sa pagpailob kag pagpalig-on nga ginatudlo sa aton sang mga Kasulatan may paglaom kita.
Kay nagasiling ako sa inyo nga si Cristo nangin-isa ka alagad sang mga Judio, sa pagpahayag nga ang Dios masaligan, sa pagtuman sang iya mga saad sa ila bantog nga mga katigulangan,
kag agod nga makadayaw man ang mga Hentil sa Dios tungod sang iya kaluoy. Kay ang kasulatan nagasiling: “Gani, magapasalamat ako sa imo sa tunga sang mga Hentil, magaamba ako sang mga pagdayaw sa imo ngalan.”
Kabay nga ang Dios nga ginahalinan sang paglaom, magpuno sa inyo sang bug-os nga kalipay kag paghidait paagi sa inyo pagtuo sa iya, agod nga ang inyo paglaom magpadayon sa pagtubo paagi sa gahom sang Espiritu Santo.
Pero, sa sini nga sulat may kaisog ako sa pagsugid sa inyo nahanungod sang mga butang nga akon ginpahanumdom sa inyo. May kaisog ako bangod sang pinasahi nga bulohaton nga ginhatag sang Dios sa akon,
nga mangin-isa ka alagad ni Cristo Jesus sa pagpangabudlay para sa mga Hentil. Nagaalagad ako subong isa ka pari sa pagwali sang Maayong Balita gikan sa Dios, agod nga ang mga Hentil mangin-isa ka halad nga nahamut-an sang Dios nga ginhalad sa iya sang Espiritu Santo.
Wala ako mahadlok sa paghambal sang ginhimo ni Cristo paagi sa akon, sa pagtuytoy sang mga Hentil sa pagtuman sa Dios, paagi sa akon mga pulong kag mga binuhatan,
paagi sa gahom sang mga tanda kag mga milagro, kag paagi sa gahom sang Espiritu sang Dios. Gani nga sa akon pagpanglakaton halin sa Jerusalem tubtob sa Ilirico, ginwali ko sing bug-os ang Maayong Balita nahanungod kay Cristo.
Ang akon gid handom halin sang una amo ang pagwali sang Maayong Balita sa mga lugar sa diin ang mga tawo wala pa makabati nahanungod kay Cristo, agod nga indi ako magbalay sa sadsaran nga ginpasad na sang iban.
Pero karon nga natapos ko na ang akon mga bulohaton sa sini nga mga lugar kag tungod kay dugay na ang handom ko sa pagkadto sa inyo sa sulod sining mga tinuig,
nagalaom ako nga mahimo ko ini karon. Luyag ako magpakigkita sa inyo sa akon pag-agi pakadto sa España, kag mabuligan ninyo ako sa akon pagkadto didto, sa tapos ako makabisita sa inyo sing malipayon sa malip-ot nga tion.
Ila gid ini luyag, kag kon sa bagay may katungdanan gid sila sa pagbulig sining mga imol. Kay ang mga Hentil nag-ambit sang espirituhanon nga mga kaayuhan sang mga Judio. Gani ang mga tumoluo nga Hentil dapat man magbulig sa mga Judio paagi sa ila materyal nga mga kinahanglanon.
Kon matapos ko na ini nga bulohaton, kag matugyan ko sa ila ang tanan nga kwarta nga natipon para sa ila, makadto ako sa España kag mahapit ako sa inyo sa akon pagkadto didto.
Mga utod, tungod sang aton pagtuo kay Ginoong Jesu-Cristo kag sa gugma nga ginahatag sang Espiritu, ginapangabay ko gid kamo nga buylogi ninyo ako sa pagpangamuyo sa Dios sing hugot para sa akon.