Mopathaihpa a châna nata â phuhpa ta Abeipa liata a vaw ly u la, bao â ngiahna maih liata vaw bao lymâ muh vy. Kei nata chyhsa hluhpi miah a deichhy tyhpa a châ.
Ei hrona pabohsa awpa ta rao a dao ngâhpazy châ ei ta, kei ta ama hnohta alyna bie ei reipa dei châ leipa ta, Zenitai awnanopa zydua ta alyna bie ama hlâ hra.
Ama o liata Awnanopa a pakhypazy chhao kha nâ naohpa muh vy. Ei kho ngaitapa Epenetâ, Asia râh liata Krista a ngiapâ tua chaipa chhao kha nâ naohpa muh vy.
Ei chiheih Andrônikâ nata Zunia, patâhna o liata ei tâlâhpazy kha nâ naohpa muh vy. Âmo cha lyuhchâpazy ta ama pahno kawpazy châ ei ta, kei Krista liata ei y hlâta a y hapazy ama châ.
Unawh saih u, biezyhpa eima cha pachupa chakhiapa ta, achhaihna taopa ta, paona châ sokhâhtuhpazy tawhta a vaih awpa ta ei châ haw ei. Âmo cha a kâsai teh u.
Cha hawhpa chyhsazy cha, eima Beipa Zisu Krista chakao leipa ei ta, âmo py a chakaopa tlao châ ei ta, reikah pahniapa nata papyupahly thainazy ta chyhsa pha molopazy ama dôvei tyh.
Khazohpa bie a zyhpa nama châzie cha mo to pahnopa a châ. Chavâta nama chô liata ei ly ngaita. Hmo phapa lâta so u la, moleina lâta deikua cha, a so leipa nama châ awpa ei khoh.
Kô hluhpi nyupa ta a ypa bienyupa liata aluahna zipa ta, ei thâtihpha reipa nata Zisu Krista bie ei chhopa hawhta tha châ patlô theituhpa Khazohpa hnohta rônahna y mawh sy.
Tahmâ deikua cha, bienyupa palâhâhpa ta a y haw. Chyhsazy ta a ngiapâ ei sala, a bie ama zyh thei nawpa ta, chhâzaw Khazohpa ta biepie ta, bienyupa cha hrohsopazy châbu hmâpa ta phopi zydua hnohta pahnosapa ta a y.