Len la ande Gazdako anau, gia sar trubul te cherdol maskar e pplal ando pachape, ta pomozin la pe suako ezgoda kai trubula la, soke voi pomozisarda bute llenen, ta i man.
Bichalau salami e kkanllirake kai chidiniaon ando cher e Priskako ta e Akilako. Den salami me amale e Epeneto kai voliu le, kai ande Asia vou saia o purvo lleno kai pachaia ando Kristo.
Den salami e Androniko ta e Juniase kai si mi familia ta kai sea manchar ppangle ande rubie, ta si len bari pachiu maskar e apostolura ta i pachaie ando Kristo mai anglal neko me.
Moliuman tumenge pplalalen, te ttoven sama pe gola llene kai anen e joli ta cheren te fulaven e pplal, ta cheren averen te peren katar so tumen sikilen. Tumen morabi te durion katar gola llene,
I o lleno kai ikkardol Gaio bichalel tumenge salami. Me besau ande leko cher, ta vou ttovel po cher te chidiniaol e kkanlliri. I o Erasto bichalel tumenge salami, gua kai arakkel e love e foroke, ta o pplal o Kuarto.
Blagosisara e Devle, kai sai cherel tumen te aven zurale ande lachi viasta kai me ppenau ta e orba cheres o Jesukristo. Ta gaia orba si isto so o Del sikada te pinllara so saia gurudino mai anglal te cherel e ppuv.
Ta akana diape te llangliolpe pala so pisisarde e poraukura, gia sar ppenda amaro Del kai zivil ostade. Gaia orba gurudine diape te llangliolpe sa e suetoke, te sai pachan ta te kanden.