Momo, nda osimbu tua kaile ovanyali va Suku, tua inalisua kokuaye lokufa ku'Omõlaye, siti, cilo, omo tua inalisua ale, ci piãla vali oku popelua lomuenyo w'Omõlaco.
Hacoko lika, puãi tu pandiyi Suku, kuenje Ñala yetu Yesu Kristu, u wa linga Mitakati oku tu muisa okulinala kuaco, o lingavo Mitakati oku pitiya okupandiya kuaco ku Suku.
Haimo, okufa kua viala tunde ku Adama toke ku Mose, kua viala ndaño ava okuti okulueya kuavo ka kua setahalele okulueya kua Adama, una wa linga ocisetahãi cu wa laika oku iya.
Puãi ocali ca eciwa halondandoko ka ca lisokele lokulueya kuaco. Momo, nda va lua va fila ekandu liomunu umuamue, ca piãla vali ocali ca Suku, haico ocali ca molehela komunu umuamue, okuti Yesu Kristu, ca supokaila va lua.
Momo, nda mekonda liekandu liomunu umuamue okufa kua viala, mekonda liomunu waco, ca piãla vali enene, ava va tambula ocali ca supoka kuenda esunga lia eciwa ocali, va viala vomuenyo mekonda liomunu umuamue, Yesu Kristu.
okuti, ndeci ekandu lia viala vuviali wokufa, haico ocali ci viala vuviali wesunga lina li fulila vomuenyo ko pui, una Yesu Kristu Ñala yetu a tu nenela.