Ngam maajum, to o wondi bee gorko feere saa'i goriiko geeto, nden kam o jeenoowo. Ammaa to goriiko maayi, o rimɗi diga umroore man, o waɗaay njeenu to o te'i bee gorko feere.
Bana non onon boo, deerɗiraaɓe am: On maaydi bee Almasiihu. Ngam maajum on maayɓe heedi tawreeta. Jonta goɗɗo feere ummitiiɗo diga maayde waato Yeesu Almasiihu mari on ngam haa en mbaawa nafugo Allah bee kuuɗe meeɗen.
Ammaa jonta, en ndimɗinaama e tawreeta, en maayɓe heedi umroore nde haɓɓi no en. Ngam maajum en kuuwantaa Allah dow laawol ɓooymawol fodde tawreeta. En ɗon kuuwana mo dow laawol kesol fodde Ruuhu maako.
Ko mbi'eten jonta? Tawreeta ɗum hakke na? Naa non sam! Ammaa to tawreeta walaano, mi waawataano anndugo baawɗe hakke. To tawreeta wi'aayno: “Taa suuna”, mi anndaano ɗume woni suuno.
Ammaa yettoore laatano Allah ngam barka Yeesu Almasiihu, Jawmiraawo men. Nder hakkiilo am, min kam mi maccuɗo tawreeta Allah, asee nder ɓanndu am mi maccuɗo hakke.