Tisa a chak loh avânga Dânin a tih theih hauh loh chu Pathianin a rawn ti ta; mihring tisa sual ang puin, a Fapa ngei chu sual thawi nân Pathianin a rawn tîr a, tisaa sual awm chu thiam loh a chantîr ta;
Pathian Thlarau chu in hnêna a chên chuan tisa mi in ni tawh lo va, Thlarau mi in ni tawh zâwk a ni. Tu pawh Krista Thlarau nei lo chu ama mi an ni lo.
Mitthi zîng ata Isua kaithotu Thlarau chu nangmahnia a awm chuan, mitthi zîng ata Krista kaithotu chuan nangmahniah a thlarau chêntîrin, in taksa thi thei chu a tinung ang.
In Thlarau dawn chu bawih anga hlauva awmtîr leh tûr che u ni lovin, fa-a siam tûr che u Thlarau a ni zâwk e; chuvâng chuan, “Abba, Ka Pa” tiin kan au chhuak ṭhîn a ni.
Chu beiseina avâng chuan chhandam kan ni si a; amaherawhchu, hmuh tawh reng beiseina chu beiseina a ni lo ve. A hmuh tawh reng chu tu nge la beisei fo?
Chuvângin, Thlarau pawh chuan kan chak lohnaah min pui ṭhîn. Engtia ṭawngṭai tûr nge tih pawh kan hre si lo va. Thlarau chuan rûm sawi hleih theih lohvin min ṭawngṭaisak ṭhîn a ni.
Tu-in nge thiam loh chantîr ang? Krista Isuan maw? Ani chu kan tân a thi chauh pawh ni lovin, a tholeh a, Pa Pathian ding lama awmin min sawisaktu a ni a.
Krista hmangaihna ata chu engin nge min ṭhen thei ang? Hrehawmnain emaw, mangannain emaw, tihduhdahnain emaw, ṭâmin emaw, saruaknain emaw, khandaihin emaw min ṭhen thei dâwn em ni?
sânna te, thûkna te, thil siam dang rêng rêng te pawhin, kan Lalpa Krista Isuaa awm Pathian hmangaihna ata chu min ṭhen thei lo vang tih ka hre chiang a ni.