Īkī ū mhayo ūyo gwalī gūtadūlīkanile kwītwa mu nzīla ya shilagīlo, īsho shitī na nguzu kūlwa nguno ya būgokolo wa mīlī, ū Mulungu wagwītile aho wantūma ū Ng'wana wakwe kwiza, alī mu suso ya mīlī gwa shibi kūlwa nguno ya shibi; ū mu mīlī gwenūyo ūshinha nsango ī shibi.
Ū mu bise yūshikīlījiwa īyo īgongilwe na būtūngīlīja bo mu shilagīlo, a bise abo tūtashimīzīlaga mu nhūngwa ja mīlī, abo tūkashimīzīlaga mu nhūngwa ja Kiimoyo.
Nguno abo balī na kikalīle ka kūlondeela nhūngwa ja mīlī, bakadīlīlaga ya mīlī. Alīyo abo balī na kikalīle ka kūlondeela nhūngwa ja Kiimoyo, bakadīlīlaga ya ng'wa Moyo Ng'wela.
Gwike a bing'we mutī ba nhūngwa ja mīlī, mulī ba nhūngwa ja ng'wa Moyo, nguno ū Moyo wa ng'wa Mulungu akikalaga mu bing'we. Alīyo ūlū ose ose atī nang'hwe ū Moyo wa ng'wa Kilisito, ū ng'wenūyo atī wakwe.
Nīyo ū Moyo wakwe ūyo akanjūūcha Kilisito kūfuma mu bafu ūlū wikala mo ū mu bing'we, ūyo akanjūūcha Kilisito ng'wenūyo akwīyinha būpanga nī mibīlī ying'we ī ya kūcha, mu nzīla ya ng'wa Moyo ūyo alī mu bing'we.
Nguno ūlū ng'wikala mu nhūngwa ja mīlī numho ng'wakūmbūla kūcha, alīyo ūlū ng'ūshibūlaga ī shītīle sha mu mīlī kūlwa nguzu ja ng'wa Moyo, mukūbiza bapanga.
Nguno ī shiseeng'wa shilī ha sīlīlī ya būsugi bo mihayo ītī na solobo, ītī kūlwa būtogwa washo, alīyo kūlwa nguno yakwe ūyo ashitūūlile a ha sīlīlī ya būsugi wenūbo, mu kwisagīlwa.
Hama ītī gīko dūhū, alīyo na a bise abo tūlī na matwajo ga kwandya ga ng'wa Moyo, nise tūkūgang'hīlaga ū mu būmunhū wise ū bo mu gatī, nguno tūgūlindīīlile na ng'hūmbū nhaale ū mhayo gwa kwītwa a bise kūbiza baana, hū kūkomoolwa kwa mīlī gwise.
Al'ū wa kūbasola būbi nani? Ū Nombeji wise ū ng'wene alī kū nkono gwa būlyo gwa ng'wa Mulungu; h'ū Kilisito Yesu ūyo akacha, hama na kūtinda ho a henaho, ūjūūka!