be bataki nin ci Korɛntikaw ma minw lara Ala la, Yezu Krista ye minw wele k'u saniya k'u kɛ Ala ta ye. A cira mɔgɔ bɛɛ ma fana, minw be yɔrɔ bɛɛ la n'u be an Matigi Yezu Krista bato. Olu ka Matigi lo, ani an fana ta lo.
Ne b'aw daali n balimaw, an Matigi Yezu Krista tɔgɔ kosɔn ko aw k'aw daa kɛ kelen ye, farali kana sɔrɔ aw cɛma. Aw ka miiri ka kɛ kelen ye aw ka kolatigɛnin bɛɛ la.
O kɔrɔ ko aw dɔw b'a fɔ k'olu ye Pɔli ka kalandenw ye, dɔ wɛrɛw k'olu ye Apolɔsi taw ye, dɔw fana k'olu ye Piyɛri taw ye, dɔ wɛrɛw fana k'olu ye Krista taw ye.
Bari Krista ma ne ci ka mɔgɔ batize, a ye ne ci ka kibaru diman le fɔ, ne kana o kɛ ni ne yɛrɛ ka hakilitigiyakuma ye, janko Krista ka saya gwengwenlɔgɔ kan kana kɛ gwansan ye.
N'u be Krista ka saya koo fɔ gwengwenlɔgɔ kan, o ye fatɔyakuma ye mɔgɔ dɔw fɛ minw be halaki sira kan. An minw be kisili sira kan, an fɛ kɔni, Ala ka sebagayako lo.
Tiɲɛ lo, diɲɛ n'a ka lɔnniya bɛɛ, a ma se ka Ala lɔn a ka lɔnniya barika la. O la, minw lara Ala la, a diyara a ye ka olu kisi, waajuli barika la, o min kɛra nalomanyako ye diɲɛ mɔgɔw fɛ.
Aw k'aw yɛrɛ filɛ n balimaw, aw minw ye Ala ka weleli mɛn ka sɔn a ma, adamaden ka miiriya la, lɔnnikɛla caaman te aw cɛma, ni fangatigiw, ani mɔgɔbabaw.
Nga koo min kɛra nalomanyako ye diɲɛ mɔgɔw fɛ, Ala y'o le ta ka hakilitigiw malo n'a ye. Barika te fɛɛn minw na diɲɛ na, Ala ye olu le woloma ka fangatigi dabari ban n'o ye.
Nga ale lo barika la aw kɛra Yezu Krista jɛnɲɔgɔnw ye, an ye lɔnniya sɔrɔ ale barika la ka bɔ Ala fɛ, ale fana sababu la, an kɛra mɔgɔtilenninw ye Ala ɲakɔrɔ ka kɛ a ta ye, ani mɔgɔhɔrɔnyaninw.