Korinth khuaa Pathian kohhran awm, mi thianghlim ni tûra koh, Krista Isuaa tihthianghlim leh hmun tina kan Lalpa Isua Krista, (anni leh keini Lalpa) hming lam zawng zawng chibai kan bûk e.
Unaute u, kan Lalpa Isua Krista hmingin ka ngên a che u, in zîngah inṭhenna awm lovin thukhat vua ula, rilru thuhmun leh ngaih dân hmun khat neiin awm khâwm rawh u.
Krista chuan baptis tûrin mi tîr lo va, Chanchin Ṭha hril tûrin mi tîr zâwk a ni si a. Thufing hmanga hril tûrin mi tîr lo, chutilo chu Krista kraws hi engmah lovah an ngai dah ang e.
Mi fing chu khawiah nge? Dân hremi chu khawiah nge? Tûnlai thila hnial thiam chu khawiah nge? Pathianin khawvêl finna hi thil âtthlâkah a siam ta a ni lâwm ni?
Pathian finna chu hei hi a ni, khawvêlin finna hmanga Pathian an hriat theih loh hnuin, kan thu hril âtthlâk hmanga ringtute chhandam hi: chu chu Pathian lâwmzâwng tak a ni si a.
Unaute u, a koh dân che u hi ngaihtuah teh u, in zînga tam tak hi tisa lama mi fing in ni lo va, mi thiltithei tak pawh in ni lo va, mi ropui chhûng zînga mi pawh in ni hek lo.
Nangni zawng, Pathian zârah, Krista Isuaah chuan in awm ta a; ani chu Pathian hnên ata kan tân finna te, thiam chantîrna te, tihthianghlimna te leh tlanna te a lo ni ta a;