लेकिन जो स्यैनि विश्वासीन की मण्डली में बिना खोरो ढकीनाक प्रार्थना या परमेश्वरो सुसमाचारा का बारिमें बतूछी, येको मतलब छै कि उ अपून घरवाला को जो उको खोरो छै अपमान करछी, उ एक इसी स्यैनि नियाती छै जैले अपूना खारास ऊस शर्मिनदा करून खिन मुंडवा रैछ।
मैं चाछूँ कि तुम खुद फैसला करा, अगर एक स्यैनि स विश्वासीन की मण्डली में बिना खोरो ढकीनाक परमेश्वर थैं प्रार्थना करछी, त क्या उ एक शर्मनाक तरीका ले ब्यवहार नाहातिनी?
लेकिन अगर स्यैनि लम्बा बाल राखौ; त यो उ खिन शोभा की बात छै, जसा तरीका ले स्यैनिन कुदरती रूप में लम्बा बाल दीई ग्यान, उसीकैं उनून सबून का बीच अराधना में अपूनो खोरो ढकभेरन राखून चैछो।
किलैकी सबून है पैलि बात त यो छै, मैंले यो सुणछ्य, कि जब तुम मण्डली में अराधना करून खिन जामा हुछा, त तुमेरि आपस में नै बननी, और मैंस विश्वास छै की उनेरि बात में कुछ त सच्चाई छै।
क्याखिनकि यो प्रभु भोज में जब खाना का बखत उछो, त तुम जल्दी अपूनो खानो दुसरा को इंतजार करे बिना खा लीछा, येको नतीजा यो छै कोई त भुखा रै जानान, और कोई जरूरत है ज्यादा पिनान।
तुम अपून घरून में खा पी सकछा। तुमून लागछो कि परमेश्वरा का विश्वासी लोग महत्वपूर्ण नाहातिनी, और तुम उन लोगून शर्मिदा करछा जो गरीब छन। मैंस तुमून कि बतूनो चैछो? क्या मैंस तुमेरि तारीफ करूनी चैछी? मैं इसो करून खिन तुमेरि तारीफ नै करनू।
इसीकैं यीशु ले खान का बाद अंगूरो को रस को कटोर लीछ और क्योछ, “यो रसो को कटोरो म्यारा खूनो नय्या वादा छै, जब कभै ले पीछा, त मेरि याद खिन येस हमेशा करनै रया।”