×

أَتَّوْرَتْ دَ أَنَّبَاوَا 2020

1 Korintiyawa 12

1
تُواْ، يَنْذُ كُمَ، یَنْعُوَنَ، غَمٜىٰدَ بَيٜىٰ بَيٜىٰ نَ رُوحُ مَيْ ڟَرْكِے ، بَانَ سُواْ كُكَسَنْثٜىٰ دَ رَشِنْ سَنِ؞
2
كُنْ سَنِ ڢَا أَ لُواْكَثِنْ دَ كُكٜىٰ بَ مَاسُبِے بَ، أَنْرُوطٜىٰكُ، كُكَ شِغَ بَوْتَرْ غُمَكَنَّنْ دَ بَاسُدَ رَيْ؞
3
دُواْمِنْ حَكَ إِنَ سُواْ كُغَانٜىٰ ثٜىٰوَ بَاوَنْدَ رُوحٌ اللَّهْ يَكٜىٰ بِشٜىٰشِ دَ ذَيْتَٻَ ثٜىٰوَ « عِيسَىٰ لَعَنَنّٜىٰ نٜىٰ!» كُمَ بَاوَنْدَ ذَيْ عِيَ ثٜىٰوَ « عِيسَىٰ عُبَنْ‌غِجِ نٜىٰ،» سَيْ وَنْدَ رُوحُ مَيْ ڟَرْكِے يَكٜىٰبِدَشِ؞
4
تُواْ، أَݣَويْ بَيْوَ إِرِ إِرِ، عَمَّا رُوحُ طَيَ نٜىٰ يَكٜىٰ بَادَسُو؞
5
أَݣَويْ هَنْيُواْيِ دَبَمْ دَبَمْ نَيِنْ حِدِمَ، عَمَّا عُبَنْ‌غِجِ طَيَ عَكٜىٰيِوَ؞
6
أَݣَويْ أَيُّكَ إِرِ إِرِ، عَمَّا اللَّهْ طَيَ نٜىٰ يَكٜىٰ بَا كُواْوَ إِيكُوانْ يِنْسُ دُكَ؞
7
اللَّهْ يَنَ بَا كُواْوَنٜىٰ مُتُمْ بَيَّنَرْ كَسَنْثٜىٰوَرْ رُوحُ مَيْ ڟَرْكِے ، دُواْمِنْ أَمْڢَانِنْ كُواْوَ؞
8
وَنِ أَنْبَاشِ بَيْوَرْ كُواْيَرْ دَ حِكِمَ تَوُرِنْ رُوحُ مَيْ ڟَرْكِے ، وَنِ كُمَ أَنْيِ مَسَ بَيْوَرْ كُواْيَرْ دَ سَنِ تَوُرِنْ وَنَّنْ رُوحُ ؞
9
وَنِ كُمَ أَنْيِ مَسَ بَيْوَرْ بَنْ‌غَسْكِيَ تَوُرِنْ رُوحٌ نَنْ، وَنِ كُمَ بَيْوَرْ وَرْكٜىٰوَ تَوُرِنْ رُوحٌ نَنْ،
10
وَنِ كُمَ بَيْوَرْ يِنْ أَيُّكَنْ بَنْ مَامَاكِ، وَنِ كُمَ أَنَّبْثِ، وَنِ كُمَ عِيَ بَمْبَنْتَ ڟَكَانِنْ رُوحُواْحِ، وَنِ كُمَ عِيَ مَغَنَ دَ هَرْسُنَ دَبَمْ دَبَمْ، وَنِ كُمَ عِيَ ڢَسَّرَ هَرْسُنَ؞
11
دُكَنْ وَطَنَّنْ رُوحُ طَيَ نٜىٰ يَكٜىٰيِنْسُ، يَكٜىٰ كُمَ رَرَّبَوَ كُواْوَ يَدَّ يَكٜىٰسُواْ؞
12
غَمَا كَمَرْ يَدَّ جِكِے يَكٜىٰ طَيَ، يَكٜىٰ كُمَ دَ غَٻُواْٻِ دَيَوَ، كُواْدَيَكٜىٰ غَٻُواْٻِنْ سُنَدَ يَوَ، سُو جِكِے طَيَ نٜىٰ؞ تُواْ، حَكَ يَكٜىٰ غَ أَلْمَسِيحُ ؞
13
دُوانْ دُكَنْمُ أَنْيِ مَنَ بَڢْتِسْمَ تَوُرِنْ رُوحُ طَيَ ذُوَا ثِكِنْ جِكِے طَيَ، كُواْ يَهُودَاوَا نٜىٰ كُواْ وَطَنْدَ بَا يَهُودَاوَا بَ، كُواْ بَايِ نٜىٰ كُواْ یَیَ، دُكَنْمُ كُوَ أَنْسَا مُكَشَا دَغَ رُوحُ طَيَ؞
14
جِكِے بَغَٻَ طَيَ بَنٜىٰ، غَٻُواْٻِنٜىٰ دَيَوَ؞
15
دَ ڧَڢَا ذَاتَثٜىٰ «دُوانْ نِے بَهَنُّ بَثٜىٰ، أَيْ، نِے بَغَٻَرْ جِكِے بَثٜىٰ؞» وَنَّنْ بَذَيْسَا تَدَيْنَ ذَمَ غَٻَرْ جِكِبَ؞
16
حَكَكُمَ عِدَنْ كُنّٜىٰ يَثٜىٰ «نِے بَ عِدُواْ بَنٜىٰ، دُواْمِنْ حَكَ نِے بَغَٻَرْ جِكِبَنٜىٰ،» وَنَّنْ بَذَيْسَا يَدَيْنَ ذَمَ غَٻَرْ جِكِبَ؞
17
دَ دُكَنْ جِكِے عِدُواْنٜىٰ دَمٜىٰ ذَاعَ جِ؟ دَ دُكَنْ جِكِے كُنّٜىٰنٜىٰ دَمٜىٰ ذَاعَ سَنْسَنَ؟
18
عَمَّا غَاشِ اللَّهْ يَشِرْيَ كُواْوَثّٜىٰ غَٻَ أَجِكِے يَدَّ يَذَاٻَا؞
19
دَ دُكَنْ جِكِنْ غَٻَ طَيَ نٜىٰ دَ إِنَا سَوْرَنْ جِكِنْ؟
20
عَمَّا غَاشِ كُوَ أَݣَويْ غَٻُواْٻِ دَيَوَ، جِكِے كُوَ طَيَ نٜىٰ؞
21
بَا دَامَ عِدُواْ يَثٜىٰ وَهَنُّ «بَا ضُوَنَ دَكَيْ،» كُواْ كُوَ، كَيْ يَثٜىٰ وَڧَڢَاڢُ «بَا ضُوَنَ دَكُو؞»
22
بَهَكَ يَكٜىٰبَ، سَيْ مَا غَٻُواْٻِنْ دَ عَكٜىٰ غَنِ كَمَرْ بَاسُ دَ ڧَرْڢِے، سُونٜىٰ مَاسُ مُهِمَّنْثِ؞
23
غَٻُواْٻِنْ جِكِے كُمَ دَ عَكٜىٰ غَنِنْ كَمَرْ بَسُكَيْ سَوْرَنْ دَرَجَبَ، مُكَنْڢِے غِرْمَمَسُ؞ تَهَكَ غَٻُواْٻِنْمُ دَ بَاسُدَ ݣَنْ غَنِ عَكَنْ ڧَارَ ݣَنْسُ؞
24
غَٻُواْٻِنْمُ مَاسُݣَنْ غَنِ كُوَ بَسَيْ أَنْيِمُسُ كُواْمٜىٰبَ؞ عَمَّا اللَّهْ يَشِرْيَ جِكِے يَدَّ يَمَيْدَ غَٻَرْ دَ بَاتَدَ دَرَجَ تَذَمَ دَ مُهِمَّنْثِ،
25
دُواْمِنْ كَدَ رَشِنْ حَطَكَيْ يَكَسَنْثٜىٰ أَجِكِے، سَيْدَيْ غَٻُواْٻِ سُكُلَ دَ جُونَنْسُ، كُلَ تَ إِرِ طَيَ؞
26
دُواْمِنْ حَكَ عِدَنْ وَتَ غَٻَ تَجِ ثِيوُاْ، دُكْ سَيْسُجِ ذَاڢِ تَرٜىٰ، عِدَنْ كُوَ أَنْيَبِے وَتَ غَٻَ، سَيْ دُكَ سُيِ مُرْنَ تَرٜىٰ؞
27
تُواْ، كُو جِكِنْ أَلْمَسِيحُ نٜىٰ، كُواْوَنّٜىٰنْكُ كُوَ غَٻَرْسَ نٜىٰ؞
28
عَثِكِنْ جَمَعَرْ مَاسُبِے، اللَّهْ يَسَا مَنْذَنِّے سُذَمَ نَڢَرْكُواْ، أَنَّبَاوَا سُذَمَ نَبِيُ، مَاسُ كُواْيَرْوَا كُمَ سُذَمَ نَعُكُ، سَيْ مَاسُ يِنْ أَيُّكَنْ بَنْ مَامَاكِ، سَيْ مَاسُ بَيْوَرْ وَرْكٜىٰوَ دَ مَاسُ تَيْمَكُواْ دَ مَاسُ كُلَ دَ عَيْكِنْ جَمَعَرْ مَاسُبِے دَ كُمَ مَاسُ مَغَنَ دَ هَرْسُنَ إِرِ إِرِ؞
29
دُكَ نٜىٰ مَنْذَنِّے؟ دُكَ نٜىٰ أَنَّبَاوَا؟ دُكَ نٜىٰ مَاسُ كُواْيَرْوَا؟ كُواْ دُكَ نٜىٰ مَاسُ يِنْ أَيُّكَنْ بَنْ مَامَاكِ؟
30
دُكَ نٜىٰ سُكٜىٰ دَ بَيْوَرْ وَرْكٜىٰوَ؟ دُكَ نٜىٰ سُكٜىٰ مَغَنَ دَ هَرْسُنَ؟ كُواْ كُوَ دُكَ نٜىٰ سُكٜىٰ ڢَسَّرَ؟
31
عَمَّا كُيِ مَرْمَرِنْ بَيٜىٰ بَيٜىٰنْ دَ سُكَڢِے غِرْمَ؞ ذَنْ كُمَ نُونَمُكُ حَنْيَرْ دَتَاڢِے دُكَ ݣَوْ؞
Hausa Bible Arabic 2020
Hausa Common Language Ajami Bible The Bible Society of Nigeria, 2020
:
Adana Bayanan kula