|
| 1 |
|
| Góa nā ōe-hiáu kóng lâng ê gú-giân, sīm-chì thiⁿ-sài ê gú-giân, nā bô jîn-ài, góa chiū chhin-chhiūⁿ lô teh tân, poa̍h teh hiáng. |
|
| 2 |
|
| Góa nā ū thoân-ta̍t Siōng-tè sìn-sit ê un-sù, ōe liáu-kái ta̍k-khoán ê ò-pì kap ta̍k-khoán ê tì-sek; góa nā ū kàu-gia̍h ê sìn-sim thang î-san-tó-hái, nā bô jîn-ài, góa chiū bô lō͘-ēng. |
|
| 3 |
|
| Góa nā the̍h só͘-ū ê châi-sán khì kiù-chè, á-sī hiàn seng-khu hō͘ hé sio, nā bô jîn-ài, tùi góa lóng bô lī-ek. |
|
| 4 |
|
| Jîn-ài sī khoan-iông; jîn-ài sī chû-pi; ū jîn-ài chiū bōe oàn-tò͘, bōe khoa-kháu, bōe kiau-ngō͘, |
|
| 5 |
|
| bōe chòe kiàn-siàu ê tāi-chì, bōe kiû ka-kī ê lī-ek, bōe khoài siū-khì, bōe khioh-hūn, |
|
| 6 |
|
| bōe ài put-gī, chí-ū ài chin-lí. |
|
| 7 |
|
| Jîn-ài ōe pau-iông it-chhè, tùi it-chhè ū sìn-sim, tùi it-chhè ū ǹg-bāng, tùi it-chhè ū nāi-sim. |
|
| 8 |
|
| Jîn-ài éng-oán chûn-chāi. Thoân-ta̍t Siōng-tè sìn-sit ê un-sù ōe kiat-sok; kóng lêng-gú ê un-sù ōe thêng-chí; tì-sek mā ōe siau-sit. |
|
| 9 |
|
| Lán só͘ bat--ê iú-hān; lán thoân-ta̍t Siōng-tè sìn-sit ê un-sù mā iú-hān. |
|
| 10 |
|
| M̄-kú hit-ê oân-choân--ê chi̍t-ē lâi, hit-ê iú-hān--ê chiū siau-sit. |
|
| 11 |
|
| Góa choh gín-á ê sî, kóng-ōe chhin-chhiūⁿ gín-á, ì-kiàn chhin-chhiūⁿ gín-á, siūⁿ-hoat mā chhin-chhiūⁿ gín-á; góa kì-jiân sêng-jîn, chiū chiong gín-á ê sū lóng pàng-sak. |
|
| 12 |
|
| Lán hiān-chāi chhin-chhiūⁿ chiò-kiàⁿ teh khòaⁿ, bū-bū bô-bêng, chiong-lâi ōe bīn-tùi-bīn khòaⁿ chheng-chhó. Góa hiān-chāi chí-ū chai chi̍t-pō͘-hūn, chiong-lâi ōe oân-choân liáu-kái, chhin-chhiūⁿ Siōng-tè oân-choân liáu-kái góa. |
|
| 13 |
|
| Án-ni, sìn, ǹg-bāng, jîn-ài chit saⁿ hāng kè-sio̍k chûn-chāi, kî-tiong siōng tiōng-iàu--ê sī jîn-ài. |
|
|
|
|