हे म्यारा विश्वासी भाईयो, मैं तुमून उई सुसमाचार याद दिलून चाछूँ जो तुमून पैलि सुणा चुक गयूँ, जो सुसमाचार में तुमूनले विश्वास ले करछ्य और जैमें तुम मजबूत ले छा।
परमेश्वर तुमोरो उ सुसमाचाराक द्वारा उद्धार करछो अगर तुम उ सुसमाचार में विश्वास करून नै छोड़ना जैको मैंले तुमार बीच में प्रचार करछ्य, वरना तुम बेकार में विश्वास में आईनाक छ्या।
क्याखिनकि मैं प्रेरितून में सबून है नानो छूँ, सच्ची पुछा, त मैं प्रेरित कहलून लकारी को ले नाहातिन, किलैकी मैंले परमेश्वर में विश्वास करूनवाला लोगून सताईना को छ्यो।
लेकिन आज मैं प्रेरित छूँ त उ परमेश्वरो को अनुग्रह छै। और उको अनुग्रह जो मैंमें भ्योछ, उ बेकार नै भ्यो लेकिन मैंले और प्रेरित है ज्यादा मेहनत ले करछ्य यो ले म्यारा तरफ भटे नै भ्यो लेकिन परमेश्वर अनुग्रह ले म्यारा द्वारा काम करून मरैछ्यो।
येक कारण अब मैं तुमूनथैं यो पुछून चाछूँ: क्याखिनकि हम सबून ले तुमार बीच योई प्रचार करछ्य कि जब मसीह मर ग्यो त ऊस फिर ज्यूनो करि ग्योछ त तुमून में भटे कोई ले यो नै कौ कि परमेश्वर विश्वासीन का मरना का बाद दुबारा ज्यून नी करोलो।
येक अलावा, हम पक्का तरीका ले उ गवाह छा जिनूनले परमेश्वरा का बारिमें झूठ बोलछ्य, क्याखिनकि हमूले गवाई दीछ कि उले मसीह स मरिनान में भटे ज्यूनो करछ्य। लेकिन अगर यो सच्ची छै कि मरीनाक ज्यून नै हुना, त परमेश्वरे ले मसीह स मरिन में भटे ज्यूनो नै कर्यो।
अगर मसीह मरिनान में भटे ज्यूनो नै भ्यो, त जो विश्वासी मर ग्यान, उन बचाई नी ग्या, बल्कि उन ले नाश हो ग्यान, मतलब यो कि हमेशा खिन परमेश्वर भटे अलग हो ग्यान।
लेकिन सच्चाई यो छै कि परमेश्वरे ले मसीह स, जो पैल आदिमी छै जैस मरिन में भटे ज्यूनो करछ्य, और उ यो बात को सबूत छै उ उन लोगून ले ज्यूनो करोलो जो मर चुक ग्यान।
लेकिन हरेक आदिमी स अपून-अपून बारीक अनुसार मरिनान में भटे ज्यूनो करि जालो; मसीह जो पैल आदिमी छ्यो जैस मरिन में भटे ज्यूनो करि ग्योछ, फिर जब मसीह वापस आलो त जो उक दगाड़ मजबूत रिशता राखनान उनून दुबारा मरिन में भटे ज्यूनो करि जाला।
फिर, जब मसीह परमेश्वरो को बिरोध करून वाली सबै बुरी ताकतून नाश कर द्योलो, उक बाद संसारो को अन्त हो जालो। तब मसीह अपून पिता परमेश्वरो को राज्य सौंप द्योलो कि उ उमें पुर तरीका ले राज्य करौ।
क्याखिनकि पवित्रशास्त्र कुंछो कि “परमेश्वर सब कुछ मसीहक अधिकार में कर द्योलो,” त यो पक्का छै कि येमें परमेश्वर शामिल नाहातिन क्याखिनकि उई छै जैले मसीह स अधिकार दीईना को छ्यो।
जब सब कुछ परमेश्वरा का च्यालाक अधिकार में हो जालो, त उ खुद स पुर तरीका ले परमेश्वरा का अधिकार में कर द्योलो, जैले ऊस यो अधिकार दीछ। ताकि परमेश्वरै सबून खिन सब कुछ हो।
हे म्यारा विश्वासी भाईयो, मैं हर दिन मौत को सामना करछूँ। मैं जो कुंछूँ उ बिल्कुल सच्ची छै जसकैं कि यो ले सच्ची छै कि मैं भौत खुश छूँ किलैकी तुम हमार प्रभु यीशु मसीह में विश्वास करछा।
या इफिसुस में, म्यारा दुशमन एक खतरनाक जानवर की नियाती छन जो मैंस नुकशान पुजून चानान। अगर म्योरो ईनाम केवल यो संसार मेंई छै, त मैंस यो सब सहन करना कि जरूरत छै। अगर यो सच्ची हुनो कि मैंस आखरी दिन में दुबारा ज्यूनो नी करि जालो, त बड़िया हुनो कि मैं मौज करनू, जसकैं यो कहावत छै, “आ हम खानू-पीनू किलैकी शायद भोल हम मर जूला और उ हमोरो अन्त होलो।”
तुम सतर्क होज्या, और पाप करून छोड़ दी; किलैकी तुमूनमें भटे थ्वाड़ा लोगून को परमेश्वरा का दगाड़ ठीक रिशता नाहातिन, मैं तुमून शर्मिन्दा करून खिन यो कुंछूँ।
अगर हम धरती में रून वाला सबै जानवरून का बारिमें ले सोचा त उन सब ले एक जसा नी देखीना। आदिमीन को अलग रूप हुछो। पक्षीनको अलग रूप हुछो। माँछान को अलग रूप हुछो। हर प्रकाराक जानवरून अलग रूप हुछो।
और जसकैं धरती में अलग प्रकाराक शरीर छन, उसीकैं आकाश में ले छन जसीकैं सूरज, चाँद और तारा छन, आकाश की चीजून में एक तरीका की खुबशुरती हुछी, और धरती की चीजून में एक दुसरी तरीका की खुबशुरती हुछी।
त इसोई मरीनाक लोगून को दुबारा ज्यूनो हुन में ले होलो। जो शरीर स उ उन दफनूनान उ इसा शरीर छन जो सड़ जानान, लेकिन जब यो दुबारा है ज्यूनो होलो त यो एक इसो शरीर होलो जो सड़ नै सकूनो।
एक आदिमी को शरीरै स जसीकैं दफनाई जाछो, उ केवल यो संसार में कोई ले आदिमीक जीवन खिन लायक छै। लेकिन जब परमेश्वर ऊस दुबारा है ज्यूनो करछो, त उको नय्या शरीर स्वर्ग में जीवन जिनाका योग्य होलो। अगर एक इसो शरीर छै जो केवल संसार में रून लायक छै, त एक इसो शरीर ले होलो जो स्वर्ग में रूनो लायक छै।
हे म्यारा विश्वासी भाईयो, मैं यो कुंछूँ, यो धरती में हमोरो शरीरो मास और खून ले बनिना को छै; हम स्वर्ग में परमेश्वरा का राज्य में अपून यो शरीराक दगाड़ प्रवेश नी कर पाला। हम स्वर्ग में अपून इस शरीराक दगाड़ नै रै सकना जो मर सकछो, क्याखिनकि वाँ कोई मौत नाहातिन।
यो अचानक होलो, इतुक जल्दी ले जतुक देर कोई अपूनो आँख की पलक झपकून में करछो। जब आखरी तुरी बजाई जालि, त जो लोग मर चुक ग्यान उन हमेशा खिन जीवन जीन खिन दुबारा ज्यून करि जाला और हम जो ज्यूना छा, हमार शरीर बदल जाला।
उसीकैं यो ले पुर होलो, जो पवित्रशास्त्र में लिखीना को छै, “हे मौत काँ छै तेरि जय? हे काँ र्यो तेरो डंक? इसीकैं पवित्रशास्त्र में जो लिखीना को छै उ पुरो होलो।”
येक कारण हे म्यारा विश्वासी भाईयों, अपून विश्वास में मजबूत रौ और गलत शिक्षान का द्वारा जन भटका, प्रभु खिन जो काम तुम करछा उमें हमेशा बढ़नै जा। क्याखिनकि यो जाणछा, कि जो केले तुम प्रभु खिन करला उको ईनाम तुमून जरूर मिलोलो