So una nɔ fɔ jɔj ɛnibɔdi bifo di rayt tɛm rich, dat na bifo di Masta kam. Dɛn tin we de na dak naw go kam na layt wande ɛn di Masta go mek ɔlman no wetin pipul bin de mekɔp na dɛn at fɔ du. Da tɛm de Gɔd go prez ɔl dɛn wan we fɔ gɛt prez.
Mi Kristiɛn brɔda dɛn, na fɔseka una mek a tek Apɔlɔs ɛn misɛf fɔ sho una fɔ mek una ɔndastand wetin a bin min wɛn a bin pul da parebul we se, “Una fɔ jɛs fala dɛn tin we rayt nɔmɔ, una nɔ fɔ du ɛni ɔda tin.” Una nɔ fɔ es wan pɔsin ɔp ɛn tɔn una bak pan ɔda wan.
Una fil naw se una dɔn gɛt ɔl wetin una fɔ gɛt? Una dɔn jɛntri? Una bin liv lɛkɛ kiŋ, we wi nɔ bin de wit una, a wish una na bin kiŋ fɔ tru, so dat wisɛf bin go rul wit una.
A tink se Gɔd dɔn put wi we na apɔsul biɛn ɔlman na di layn lɛkɛ pipul we dɛn kɔndɛm fɔ day bifo ɔda pipul! I dɔn put wi de fɔ mek ɔlman na wɔl ɛn ɔl di enjɛl dɛn si wi.
Sote nɔ, tɛm kin de we wi nɔba it; tɛm kin de we wi nɔba drink ɛnitin; na chɛr chɛr klos wi kin wɛr; pipul kin bit wi; wi kin jɛs de go frɔm ples to ples, wi nɔba gɛt wan ples fɔ tap;
If una gɛt ɔmɔs tawzin ticha dɛnsɛf, we una de wit Krays, na wangren papa nɔmɔ una gɛt. We una de waka wit Krays Jizɔs, a dɔn bi una papa we a dɔn briŋ di Gud Nyuz kam to una.
Na di rizin dis we mek a de sɛn Timoti go to una. I tan lɛkɛ mi pikin we a sho di Masta in we; a lɛk am bad; i de du wetin di Masta tɛl am fɔ du. I go mɛmba una bɔt dɛn rul we de gayd mi we a de waka na di nyu layf we Krays Jizɔs gi mi, ɛn we a de tich pipul na ɔl dɛn chɔch.