Woto wã, da yãg-y ne bʋʋd ye. Bas-y tɩ Soaala wa. Bãmb n na n vẽneg lika zãnga la b puk bũmb ning fãa ninsaal sẽn sed a sũurẽ. Wakat kãng la ned kam fãa na n deeg Wẽnnaam nengẽ, pẽgr ning a sẽn tog ne.
M saam-biisi, yaa yãmb yĩng la m dɩk maam ne a Apolos makre; m tʋlgame tɩ y ges tõndo n wʋm yelbũnd kãnga võore: Makr sẽn ya mak faoogo la sẽn ka yiis Sebr sõng pʋgẽ. M dɩka maam ne a Apolos makrã tɩ y ra wa wuk ne nagre n kẽ nin-yend n bas a to ye.
Yãmb yaa neb sẽn zoe n tɩge, sẽn zoe n lebg arzɛk rãmba; y zoe n lebga dĩm dãmb tɩ ka tũ ne tõnd tʋʋmde. D zug kõn yɩẽ noogo y sã sɩd lebgẽ la rĩm dãmba, tɩ d naag-y n dɩtẽ naam?
La sã n ya ne mam tagsgo, tõnd, Krista Tʋʋm-tʋmdbã, tõnd n zãr ne naam; b zĩndga tõnd poorẽ zĩigã, wa b sẽn paalg b rãmb kũum bʋʋdo; tõnd n lebg bɛɛb laad dũniya zĩig zãnga, malɛk rãmb la ninsaalb nifẽ.
Tõnd lebga wa gãeemse, Krista yĩnga, tɩ yãmb ket n zĩ ne y yẽesem, Krista maasmẽ. Tõnd koms n dɩgame tɩ yãmb wɩɩd ne pãnga. Yãmb gãee ne waoore tɩ sãbsgo ya tõnd pʋɩɩre.
Ba y ya karen-biis sẽn tar neb ka tɛk sẽn get y yelle, Krista tũudma pʋgẽ, bãng-y tɩ y ka tar ba rãmb kʋʋng ye. Yaa maam bal n dog-y Krista buudẽ ne Koe-nooga moonego.
La yaa rẽ me yĩng la m tʋm a Timote y nengẽ: a yaa m bi-nongre la a pelga a pʋg ne Krista tũudem. A na tẽeg-y m sẽn yals bũmb ninga Krista tũudma poorẽ, la m sẽn zãmsd Tigeng kamba fãa.