मनी जे काही करान ईच्छा शे ते करासाठे मी स्वतंत्र शे, मी प्रेषित शे, मनी आपला प्रभु येशु ले देखेल शे, तुमी मना काम ना प्रतीफय शेतस जो मनी प्रभु ना साठे करेल शे.
कदी दुसरा लोक नई मानतस कि मी प्रभु येशु ना प्रेषित शे, पण तुमी लोक म्हणाले पाहिजे. कारण कि मीच शे जो तुमना लगून सुवार्ता ले लिसन उनू, प्रभु येशु ख्रिस्त वर तुमना विश्वास कण हय स्पष्ट हुई जास कि मी ख्रिस्त ना प्रेषित शे.
आमले हवू अधिकार शे, कि आमी कोणी तरी ख्रिस्ती विश्वासीनी संगे लग्न करीसन तिले संगे लिसन फिरोत, जसा दुसरा प्रेषित आणि प्रभु ना भावू आणि केफा (पेत्र) करतस.
एक सैनिक ले कदी बी आपला खर्च स्वता ले नई देन पळत. कोणी बी माणुस असा नई शे जो द्राक्षमया लावस आणि तीना मधला फय नई खावो, कोणी बी माणुस असा नई शे जो मेंढ्यास्नी राखोई करस आणि तेना दुध नई पिवाव.
मोशे ना नियम बी असाच सांगस, मोशे ना नियम मा लिखेल शे, “धान्य नि मळणी करतांना बईल ना तोंड वर मुकसा घालज्यात नका.” काय तुमी असा विचार करतस कि परमेश्वर फक्त बईलस्निच चिंता करस? नई.
तो खास करीसन आमना साठे सांगस. हा, आमना साठेच लिखामा एयेल शे, कारण कि उचित शे, कि शेतकरी आशा कण वावर करस आणि जो नागरस तेले नागर कणच उत्पन्न ना भाग भेटानी आशा कराले पाहिजे.
जव कि दुसरा लोक ज्या तुमना मधमा प्रचार करतस तेस्ले हवू अधिकार शे, त निश्चितच मले आणि बर्णबा ले बी हवू अधिकार शे. तरी बी आमनी कदीच तुमना वर जबरजस्ती नई करी तुमी आमले काही देवोत, पण सर्व काही सहन करतस, कि आमना द्वारे ख्रिस्त नि सुवार्ता नि काही रोक नई होवो.
पण मनी एस्ना मधून एक बी अधिकार ना वापर नई करनू. मी हय एनासाठे नई लिखी ऱ्हायनु कि तुमी मनासाठे काही करोत, कदीच नई. एनातून त चांगल मनासाठे मरी जान शे. कारण कि कोणी बी ह्या गोष्ट वर गर्व करा पासून कोणी रोकु नई सकत कि मनी आपला ध्यान स्वता नि ठीयेल शे.
कदी मी सुवार्ता आयकाळू, त एना कण मले गर्व करानी कोणतीच गोष्ट नई, कारण कि हय त मले सोपामा एयेल जबाबदारी शे. आणि कदी मी सुवार्ता ना प्रचार नई करत, त मनावर धिक्कार शे.
कारण कि कदी आपली ईच्छा कण मी हय काम करस, त मजुरी मले भेटीन. आणि कदी हय काम मी आपली ईच्छा कण नई करत, तरी बी हय जबाबदारी मले परमेश्वर ना कळून सोपामा एयेल शे.
एना अर्थ हय शे, जरी लोक मले काही देतस तरी बी मी तेस्नी आदन्या मानाना साठे बांधायेल नई शे, तरी बी मी सर्वास्ना सेवक बनणु एनासाठे कि मी तेस्ले ख्रिस्त मा लई सकू.
म्हणजे जव मी यहुदीस संगे होतु, त मी यहुदीस सारखा ऱ्हायनु, एनासाठे कि यहुदीस्ले ख्रिस्त मा लई सकू. जव मी मोशे ना नियमले मानणारस्ना संगे होतु, त मी बी मोशे ना नियम ना आधीन ऱ्हायनु, जरी मले मोशे ना नियमले मानानी गरज नई होती तरी बी मनी अस कर एनासाठे कि मी नियमले मानणारस्ले ख्रिस्त मा लई सकू.
तसाच जव मी दुसरा जाती ना लोक संगे होतु, त मी दुसरा जाती ना लोकस सारखा ऱ्हायनु ज्या यहुदी मोशे ना नियम ना पालन नई करतस, एनासाठे कि तेस्ले ख्रिस्त मा लई सकू. एना अर्थ हय नई शे कि मी परमेश्वर ना आदन्यास्ना पालन नई करत, कारण कि मी प्रत्येक टाईम ख्रिस्त ना आदन्यास्ना पालन करस.
जव तेस्ना संगे ज्या विश्वास मा कमजोर शेतस, त मी तेस्ना सारखा वागत होतु, एनासाठे कि मी ख्रिस्त ना अनुकरण करामा तेस्नी मदत करी सकू. मी सर्वा माणसस साठे सर्व काही बनेल शे, एनासाठे कि कोणत्यान-कोणत्या रिती कण काही लोकस्ना तारण कराई सकू.
सर्वा स्पर्धक प्रत्येक गोष्टीस्मा संयम ठेवतस त्या नाशवान मुकुट ले प्राप्त करासाठे असा करतस, पण आमी असा मुकुट ले प्राप्त करासाठे हय करतस जो कदी नाश नई होवाव.