Mɔgɔ jumɛn le be yen n'a be sɔlidasiya kɛ n'a te sara sɔrɔ? Mɔgɔ jumɛn be yiriforo bɔ n'o tigi t'a deenw nɛnɛ? Walima mɔgɔ jumɛn be begɛnw mara n'o tigi t'o nɔnɔ sɔrɔ ka min?
Kuma min fɔra, o ma fɔ anw le kosɔn wa? Ɔnhɔn, o koow sɛbɛnna an le kosɔn, bari sɛnɛkɛla ka kan ka l'a la ko a ben'a niyɔrɔ sɔrɔ, ani sumangosibaga fana be l'a la ko a ben'a niyɔrɔ sɔrɔ.
Ni mɔgɔ dɔw b'o tɔnɔ minɛna aw fɛ, anw do? Anw ka kan n'o ye ka tɛmɛ olu kan, nga anw m'o jati. Anw be koo bɛɛ muɲu, waasa sababu dɔ kana Krista ka kibaru diman ɲataga bali.
Nga ne kɔni m'o tɔnɔ nin si sɔrɔ. A fana ma kɛ ko ne b'a fɛ k'o sɔrɔ aw fɛ, k'o le y'a to ne be nin koo sɛbɛn aw ye dɛ. Yanni ne b'o koo ɲini, ne ka sa o ka fisa n ma,
Ka ne to zuwifuw cɛma, ne tun kɛra i n'a fɔ olu, waasa ne ka se ka zuwifuw sɔrɔ. Ni ne be ni Ala ka sariya sira taamabagaw ye, n kɛra i n'a fɔ olu, waasa n ka se ka olu sɔrɔ fana k'a sɔrɔ n t'u dɔ ye.
Ka ne to siya wɛrɛw cɛma, Ala ka sariya te minw fɛ, ne tun kɛra i n'a fɔ olu, waasa n ka se k'olu sɔrɔ. Nga a ma kɛ i n'a fɔ ne te Ala ka sariya kɔrɔ! Krista le ye ne ka sariya ye.
Barika te mɔgɔ minw na, ka ne to olu cɛma, ne tun be n yɛrɛ kɛ barikatan ye, waasa ka olu sɔrɔ. Ne ye n yɛrɛ kɛ bɛɛ ka mɔgɔ ye waasa cogo o cogo n ka se ka dɔw kisi.
Aw b'a lɔn ko mɔgɔ minw be ɲɔgɔndanboli kɛ farikolo tolonkɛyɔrɔ la, u bɛɛ be boli, nga mɔgɔ kelen le be sara nin sɔrɔ dɛ. Aw ka boli ten fana ka o sara nin sɔrɔ.