Kan tâna sawi a ni zâwk lâwm ni? Ni e, kan tâna ziak a ni. Lei lettu chuan beisei neiin let sela, buh chîltu pawhin chan neih ve beiseiin chîl rawh se.
Mi dangten in laka chutiang an phût theih chuan keini chuan thei lehzual tûr kan ni lâwm ni? Phût thei mah ila kan phût ngai lo. Krista Chanchin Ṭha chu kan dâl loh nân, engkim chhel takin kan tuar hrâm hrâm zâwk ṭhîn.
Mahse, kei chuan a enga mah hi ka chhawr lo, ka chunga chutiang in tih nân hei hi ziak ka ni lo; ka chhuan hi eng mah lova mi siamsak ai chuan ka tân thih a ṭha zâwk.
Tichuan, Juda-te ka lâk theih nân Juda-te zîngah Juda mi angin ka awm a; Dân hnuaia awm ni lo mah ila, Dân hnuaia mite ka lâk theih nân Dân hnuaia awm angin ka khawsa ṭhîn.
Mi chak lote ka lâk theih nân an zîngah chak lo angin ka awm ṭhîn. Chutiang chuan, eng emaw ti tala mi ṭhenkhat ka chhandam theih nân mi tin zîngah kawng hrang hrangin ka awm ṭhîn.
Intlânsiakho chu theihtâwp chhuahin an tlân ṭhîn a; mahse, pakhat chauhvin lâwmman a hmu ṭhîn tih in hre lâwm ni? Chutiang chuan lâwmman hmu ngei tûrin tlân rawh u.
Intlânsiaknaa tel tûrte chu kawng engkimah an insûm ṭhîn, chawimawina lukhum chhe mai thei hmu tûrin an bei a, keini erawh chuan chawimawina lukhum chhe thei lo hmu tûrin kan bei a ni.