Maam a Poll sẽn yaa a Zeezi Kiris tʋmtʋmd Wẽnnaam sẽn yãkã, la tõnd ba-biig a Tɩmote n tʋmd seb-kãngã Wẽnnaam nebã sẽn be Korẽntã, la Wẽnnaam nebã fãa sẽn be Akayi soolmã fãa pʋgã.
Tõnd sã n namsdẽ, yaa tɩ yãmb na paam belsg la fãagre. Tõnd sã n paamd belsgo, yaa sẽn na yɩl la yãmb paam belsg sẽn na kõ yãmb pãng tɩ y tõog n sak namsg nins tõnd sẽn paamdã ne sũ-mare.
Sɩd me, d ba-biisi, tõnd ka rat tɩ yãmb zɩ yel-pakr nins tõnd sẽn paam Aazi soolmẽ wã ye. Tõnd namsa wʋsg tɩ looge, n yɩɩg tõnd pãnga, hal tɩ d dag n ka leb n tẽed tɩ d na n vɩɩmdame ye.
Tõnd da tagsda d sũyã pʋs tɩ b na n kʋʋ tõndo, rẽ sẽn paam tõndã yaa sẽn na n yɩl tɩ tõnd kõn teeg d mens ye, la tɩ d na teeg Wẽnnaam ning sẽn vʋʋgd kũumã.
Bala, bũmb ning sẽn kõt tõnd sũ-noogã, yaa tõnd sũ-bãngrã sẽn kɩt kaset tɩ dũni wã neb sʋka, tõnd kẽna ne sõmblem la pʋ-peelem sẽn yit Wẽnnaam nengẽ wã yĩnga, la d kẽna yãmb sʋk a woto n yɩɩda. La ka yɩ ne ninsaal yam ye, yaa ne Wẽnnaam barkã la d maan woto.
Dẽ yĩnga, mam sẽn da tʋlg n maan bõn-kãngã, mam wilgdame tɩ m ka yas m zĩ-yend bɩ? Bɩ mam yam-yãkrã yaa ninsaal dẽnda tɩ mam tõe n yeel tɩ n-yẽe, n leb n yeel tɩ ayo?
Bala, maam ne a Sɩlvẽ la a Tɩmote sẽn da moon Wẽnnaam bi-ribl a Zeezi Kiris koɛɛg yãmb sʋka ka yɩ n-yẽe la ayo ye, la a Zeezi pʋgẽ, yaa n-yẽe bal n be.