Me o Pablo apostol e Jesukristoko pala e volia e Devleki ta o Timoteo, bichala salami e llenenge katar e khanlliri e Devleki kai si ando Korinto ta sa e phlalenge kai si ande Akaia.
Vou pomozil amen ande sa amare nuzde ta ande amare dukha te sai i amen pomozi golen kai si ande nuzda, ta gia sar o Del pomozisarda amen isto gia amen te pomozi averen.
Amen te nakha patnia, si te sai tumen aven braduime. O Del pomozil amen te sai pomozi tumen, ta gia sai ka terpin esmiro e duk ta e patnia kai i amen nakha.
Acharaia amen sargo e llene kai pe iek kris chinen lenge te meren. A sa gala ezgode nakhle te sai sikiva te na avel amen vera ande amende, te sai pacha ando Del kai sai cherel te usten e mule katar o meripe.
Molintumen pala amende ta gia ka pomozin amen. Te si but llene kai molinpe, ondaka but llene ka den fala e Devle cheres e ezgode kai o Del cherel, ta pala sa e ezgode lache kai vou del amen.
Amen veselia amen, soke llana kai cherdam ezgode lache ta avilam chache saurrenchar ta mai anglal tumenchar. Ni cherdamle amare bizaimaia, ta da fala e Devle, soke vou si kai pomozisarda amen pe volimaia.
soke akana acharden mai but so sam amen, ta kana ka avel o Gazda o Jesukristo, tumen sai ka aven vesele amendar, gia sar i amen ka ava vesele tumendar.
Soke me mislivaman te llau ande Masedonia, ta mapalal te sai iriv man pale tumende, ta gia tumen sai pomozisardena man te resav ande phuv katar e Judea.
¿A so, tumen mislin kai me ni mislisailem mai anglal so te cherav? ¿O mislin tumen kai me sem sar si sa e llene, kai mai anglal phenav ea ta isto ande gua vreme phenav iok?
O Timoteo, o Silas ta me phendam tumenge e alava katar o Jesukristo, o Chavo e Devleko. Ta o Jesukristo ni phenda ea ta iok isto ande iek vreme. O Del phenda ea suako drom ando Jesukristo.