Amaa wahu ni daa zaŋ o yɛmbimbiɛri n-yɔhim Awa shɛm la, n zɔri ni yi gba tɛha ti ŋmaligi kpe yɔɣu lala ka chɛ yi suhuyini mini yi ʒiɛyimtal’ shɛli yi ni mali zaŋ chaŋ Masia san’ la.
Dama yi saɣiri deeri ninvuɣ’ so ŋun kani yi sanna nti yihiri Yisa so mi waazu ka chɛ ti ni daa pun yihi ya Yisa so yɛla waazu la, ka deeri shia so mini lahibal’ sun shɛli din be di ko ka chɛ Naawuni Shia Kasi mini lahibal’ sun shɛli yi ni daa deei ti san’ la.
N ni daa be yi sani ka ti lan ka shɛl’ la, n daa bi zaŋ n yɛla doli yi ni so, dama m mabi’ shɛb’ bɛn daa yi Masidɔnia na la daa ti ma n ni kɔŋ shɛli maa. Dinzuɣu n daa bi zaŋ n yɛla doli yi ni so, ka na kul ku zaŋ n yɛla doli ya pumpɔŋɔ zaŋ chana.
Yi ni shɛb’ booni tinim’ la ninvuɣ’ gbarima, ka hal di ni dihi ma vi la zaa yoli, n saɣi lala! N tɔɣisirimi kaman jɛrigu n-nyɛ ma la. Ka so yi bɔri ni o nyu bara binshɛli zuɣu, n gba ni tooi nyu bara lala:
N kul tɔɣisirimi kaman yinyaa n-nyɛ ma la. Bɛ nyɛla Masia tumtumdiba? N nyɛla Masia tumtumda gari ba: N tum pam gari ba gba; bɛ kpɛhi ma sarika n-gari ba: n nya buri din ka kalinli; ka be kum barina ni waawaayili.
Siɣimsiɣim buta ka bɛ zaŋ jaaŋgbɛbil’ fiɛb’ ma; ka lab’ ma kuɣa yim. Siɣimsiɣim buta ka n ŋariŋ saɣim teeku puuni; ka m be teeku puuni wuntaŋ’ ni mini yuŋ.
N kul bela chandi ni waawaayili, ka be barina ni kokpɛɣu ni, ka be barina ni ŋmɛnditoya sani, ka be barina ni mmaŋmaŋ’ zuliya sani, ka be barina ni bɛn pa Yɛhudianim’ sani, ka be barina ni tiŋ’ puuni, ka be barina ni mɔɣu ni, ka be barina ni teeku puuni, ka be barina ni m mabihi bɛn nyɛ ʒirinim’ la gba sani.
N tumdi tuun’ kpɛma ka nyari wahala, ka gaani gom waawaayili, ka kpiri kum ni kɔnyuri, ka kɔŋdi bindirigu waawaayili, ka chani gbinfini ka wari mali ma.
N ni daa be Damaskus, Naa Arɛtas ni daa zali so ka o su Damaskus fukumsi la daa chɛ ka tɔbbihi chaŋ ti zan’ la tiŋ’ maa gooni dunoya ni ni bɛ gu soli gbaai ma,