Ŋɑɑn n mɔk jijiet i pɑɑk k mɑɑn n mi nɑn niib tɑn sɑɑ fit mɑnn kpɑnn’i k biil i dudukt, ɑ i ji dɑɑ wɑɑ Klistu fɑnu, nɑn wɑɑɔk nbɑ din kpɑnn Ef biɑnŋ nbɑ nɑ.
K mɑɑn i tuu mɔk suklu nɑn wun nbɑ bɑɑl i buol ni k yet’i lɑbɑliɑ nbɑ k tie Yiesu lɑbɑɑl nbɑ k t din yet’i nɑ. I gɑɑn siek nbɑ k tie Foŋɑnm, k biɑ gɑɑn lɑbɑɑl nbɑ k tie Yiesu lɑbɑmɑnn.
Yuo nbɑ k n din muɑntl Yennu lɑbɑmɑnn k tien’i nɑ, n din k gɑɑl i bonsiɑl l pɑɑk. N din sikn n mɔnŋ e ɑ n donn’i. Mɑɑ din tun nnɑ mɑnŋ, n mɔk biit e l pɑɑk ii?
Mɑɑ din be i buol ni yuo nbɑ k k mɔk siɑl nɑ, ŋɑɑn n lek din k muks’i ɑ yin sonm’n nɑn siɑl. T nɑɑ wɑɑs nbɑ din nyii Mɑɑseduɑnn din bɑɑl nɑn bonsiɑl nbɑ k n din luon nɑ. Mɑɑ lek din be biɑnŋ nbɑ l yuo nɑ, n biɑ lek sii be nnɑ e. N kɑn muks’i ɑ yin sonm’n nɑn bonsiɑl.
N biɑ sɑɑ ŋɑnm yet’i wɑɑ, i dɑɑ duki nɑn n tie wɑɑtɔ e. Ŋɑɑn l i tie k i lek i duki nnɑ i e, yin gɑɑl’n nɑn yɑɑ sɑɑ gɑɑl wɑɑtɔ bɑnnu nbɑ, k n fit wɑnn n mɔnŋ wɑɑnm-nnɑ.
N tiin fei ŋɑɑn tɑɑ din be i buol nɑ, t din k mɔk pɑɑlu k sɑɑ fit tun nnɑ. Nisuɑ i mɔk pɑl k wɑnt u mɔnŋ siɑl pɑɑk, n mun sɑɑ wɑnn n mɔnŋ l pɑɑk. N set piɑk nɑn wɑɑtɔ nɑ e.
B i tie Klistu tuontunnɑ i e, min e set tie Klistu tuontunnɔ k cie’b (n pɑk nɑn wɑɑtɔ nɑ e). N tuun tuonn k cie’b. B kuɑn’n dɑnsɑlk k cie’b. B buo’n gbɑnn k cie’b. N biɑ lɑ ninbɔnŋ bonciɑnn k k fɔk nɑn kuun k cie’b.
Luonmtieb din buo’n lɑnbɑnɑ tɑɑl muntɑ. Niib din tɑn jɑɑt’n tɑnɑ siɑn-yuo. Ŋɑlnt din libt cɑɑn nɑn’n nyun ni tɑɑl muntɑ, k yentunmunn nɑn nyɑmunn k n din be mɔkgbenŋl nyun pɑɑk.
N din tuu sonm yuo kul k sɑɑ n sɔni, k lɑɑt nyun ni ninbɔnŋ, k biɑ tuu lɑɑt ninbɔnŋ fɑt-tieb buol ni, nɑn n tiɑɔnŋ niib buol ni, nɑn nibuolgɑnu buol ni, k biɑ lɑɑt ninbɔnŋ digbɑngbenŋɑ ni, nɑn muuk ni, nɑn mɔkgbenŋl ni, nɑn nisiɑb nbɑ kpɑnn ɑ b tie Klistuweilɑ nɑ buol ni.
N din set tuun tuonɑ nɑn ninmɔnn, k lɑɑt fɑlɑ, k k guɑnt nyiɑɔk yuo nɑn yuo. Kon nɑn nyun-nyuklu din tuu suol’n, k n kɔnŋt jiet, k wɑɑt so’n, k n bongbɑbkɑl k jɑnŋt’n.
Mɑɑ din be Dɑɑmɑɑs duo ni yuo nbɑ, kpɑnbɑl Alietɑɑs yuo nɑ, duo mɑnŋ ni gobnɑ din luon wun suol’n e, k din te k sejenm sie duo mɑnŋ tɑnmɔb ni k goli ɑ bin suol’n.