N daa mi do’ so ŋun be Masia ni yuun’ pinaanahi din gari ŋɔ puuni, ka Naawuni daa kpuɣ’ o du zuɣusaa m-mali ti paai alizanda puuni ha. O yi daa bela o niŋgbuŋ ni bee o yi daa ka o niŋgbuŋ ni, m bi mi; Naawuni m-mi.
Ka hal n yi nyu bara gba, m bi tum jɛrilim, dama n ni tɔɣisila yɛlimaŋli di puuni. Amaa n zaɣisila lala niŋbu ni di chɛ ka so ku duhi ma n-gar’ o ni nya ma ka n niŋ shɛm zuɣu bee o ni wum ka n niŋ shɛm zuɣu.
Daliri din ni chɛ ka n ku duhi mmaŋa n-yaɣi n ni daa nya kahigibunim’ pam shɛŋa la zuɣu, ka go’ shɛli din be kaman Sintani tumo la kuhi ma n-kpalim be n niŋgbuŋ ni ni di muɣisi ma n-chɛ ka n ku duhi mmaŋ’ yaɣi.
Amaa ka o daa yɛli ma, “N daalibarika saɣ’ a, dama n yaa niŋdi dɛde chɔɣinsi ni.” Ka n kul ni nyuri bara m-pahiri ni suhupiɛlli n chɔɣinsi zuɣu ka di chɛ ka Masia yiko tooi be n ni.
Masia zuɣu m mali suhupiɛlli chɔɣinsi ni mini ʒiɛmbu ni ni kɔŋsim ni ni alaka nyabu ni ni wahala dibu puuni, dama n yi ti gbarigi, di saha ka n lan nyari yaa.
N tɔɣisi jɛrilim m barinyubo ni, amaa yinima m-muɣisi ma ka n niŋ lala. Di di simdi ni yinim’ paɣi ma, dama hal n yi kul pa shɛli, n lee pala ŋun pɔri tuum’ shɛba yi ni tibigiri la ni.
Siɣimsiɣim buta m-bɔŋɔ ka m mali shili ni n ka yi sanna; ka m mi ku zaŋ n yɛla doli ya, dama m bi bɔri yi binshɛli, amaa yimaŋmaŋ’ ka m bɔra. Pa bihi n-dihiri bɛ laamba, amaa bihi laamba n-dihiri ba.
N daa kpam Taitus jaande ni o ka yi sanna, ka daa lan chɛ ka ti mabi’ so pah’ o zuɣu na. Taitus daa di yi zuɣu nyɔri? Pa biɛhigu yini ka ti mali? Pa so’ yini ka ti doli?
N zɔri ni di pa shɛli ka n ti ka yi sanna m bi nyan ya kaman n ni di bɔri ni yi be shɛm, ka yi mi ti bi nya ma kaman yi ni di bɔri ni m be shɛm. Di pa shɛli ka naŋgbankpeeni mini nyuli zabbu ni suhuyiɣisili ni zunyuŋ ni tiŋŋmaŋ ni nyaanzubo ni maŋduhibu ni duŋtaabo ti be yi sunsuuni.
N zɔri ni di pa shɛli ka n ti lab’ yi sanna ka Naawuni ti siɣisi ma yi sani, ka n fabili bɛn daa tum alahichi ka na bi niŋ tuuba bɛ daɣiri tuma mini bɛ zina niŋbu ni bɛ kɔr’ biɛri tuun’ shɛŋa bɛ ni tumdila zuɣu.