Mi anndi Masiihiŋkeejo goɗɗo, waɗi duuɓi sappo e nayi jonta. O eeŋginaama haa asamaawu tataɓu. O ɗonno nder ɓanndu na malla haa yaasi ɓanndu na! Mi anndaa. Sey Allah tan anndi.
Koo to mi yiɗi juraago, naa mi paataaɗo, ngam gooŋga mbi'anmi. Ammaa mi yiɗaa juraago, ngam taa goɗɗo ɓurnammi dow ko o yi'i haa am malla ko o nani haa am.
Ngam taa mi mawnito daliila wahayuuji kaayeefiiji ɗi ngi'mi, Allah hokki yam ko naawni yam bana gi'al nder ɓanndu am, ɗum nelaaɗo Sayɗaanu mo ɓilli yam ngam taa mi mawnito.
Ngam maajum mi ɗon seyoro tampe am, mi ɗon seyoro kuudi yimɓe, cakle, toonyaaŋgeeji e ɓillaaje ngam daliila Almasiihu. Ngam yaake mi tampuɗo, yaake man nden mi cemmbiɗɗo.
Woodi ko mi waɗani jama'aaje nuɗɗinɓe goɗɗe, nden mi waɗanaay on ɗum na? Ɗum huunde woore tan: Mi ƴamaay on kumtanammi haaje am. Njaafaneeɗam aybewol ngo'ol kadi!
Mi tori Titus o yahda bee deerɗiraawo goɗɗo haa mooɗon. Kadi Titus ƴoyri on, jaɓti on huunde na? Naa min ɗiɗo fuu, min kuuwi bee anniya ngoota, bee tokkaago laawol gootol na?
Teema on ɗon numa diga ɓooyma, min ngiɗi gooŋɗingo ko'e amin yeeso mooɗon. Naa non sam! Min ɗon mbolwa yeeso Allah bana no Almasiihu yiɗi. Deerɗiraaɓe yiɗaaɓe, min ɗon mbi'a ɗum fuu ngam haa min cemmbiɗina on nder nuɗɗinki.
Mi ɗon hula, saa'i ngaranmi haa mooɗon mi tawrataa on bana no ngiɗmi, onon boo on tawrataa yam bana no ngiɗɗon. Mi ɗon hula mi tawan jokkirli e ɓernuki e hallingo woɗɓe e bolle kalluɗe e tufle e mawnitaare e fitinaaji haa mooɗon.
Mi ɗon hula to mi wari kadiboo haa mooɗon, Allah am leesnammi, haa mi woya dow ɗuuɗɓe tokkotooɓe waɗugo hakke bana naane, saliiɓe accugo kuuɗe muuɗum'en cemtiniiɗe e daakaareeku.