Che ɨma ma arowia Cristo re. Jare uasa ma catorce año chereraa ara ɨwatete oï wae pe – jokua ko jae kiape Tumpa oï wae pe etei. Aikuaa’ä oo ra cherete ani oo’ä ra.
Erëi jae jei chewe kuärái: “Ambɨsɨrɨta’ä ndewi. Erëi che chepɨakawi rupiño nomborɨta nemɨawäta waerä. Jokuaño ko ikawita ndewe. Echa’ä nepɨräta’ä neï yawe, jare che nomborɨ nemɨawäta waerä yawe, jokoropi ko chepuere aechaka kërái chembaepuere tuichaete ko.” Jukuärái yandeYa jei chewe. Jáeramo che ayerowia chepɨräta mbae wae re, jare jokua re ko che chemiärita aï. Echa’ä chepɨräta mbae wae rupi uyekuaa Cristo imbaepuere.
Jáeramo ime yawe kía mbae kachi jei chekotɨ wae, che ayerowia aï jokua re. Jare jae nunga wi che ayerowia aï jokua chepɨräta mbae wae re, jare mbaesusere reta re, jare yembɨawái reta re. Añetete che aiporara tuicha Cristo pe ayeyokui ramo. Erëi jokua re ayerowia aï. Echa’ä che chepɨräta’ä aï yawe, Cristo imbaepuere uparawɨkɨ cheré chepɨräta waerä.
Mase, mokui wese ma a apou pepɨ. Jare añawe ayeyapɨkatu aï a ye apou waerä pepɨ. Jare a ma awäe yawe, jae nunga wi aipota’ä pe reta chemborɨ waerä. Echa’ä che aipota’ä korepoti pewi. Che aipota pomborɨ waeräño, echa’ä mbaetɨ ko sambiaɨ reta uyandareko waerä tu re. Tu ko jae uyandareko waerä isambiaɨ reta re. Jukuärái wi che ayandareko peré cheraɨ reta rami.
Jáeramo che ayerowia rewe amɨkañɨta opaete chembaembae pomborɨ waerä. Jare che etei wi añemeeta pomborɨ waerä. Yepe tëi pe reta cherau’ä ma peo peï aramoi, erëi che jekuaeño jeiete puauta aï.
Che amɨkɨrëɨ hermano Tito oo waerä pepɨ, jare amondo wi jae ndiwe ïru hermano pe reta pikuaa wae. Erëi, ¿Tito pembɨtawɨ yerá? Pe pikuaa jae pembɨtawɨ'ä etei ko. Echa’ä che jare Tito oyowake ko noï.
Che ayembɨpɨa’ä aï peré, aramoi a apou pepɨ yawe, puechata mbaetɨ ikawi peï kërái che aipota wae rami. Ayembɨpɨa’ä aï, aramoi puipokouta yeaka rupi, jare ñemɨro rupi, jare mbochɨ rupi, jare yembutuicha rupi, jare yembɨkate rupi. Jare aramoi imeta pepɨte pe indayepota wae reta, jare iñera japicha re wae reta, jare tekorái reta.