O duito drom kai sema tumende, phendem tumenge, ta akana kai sem dur tumendar phenaule pale, kai ka avav zuralo gole llenenchar kai cherde o bilachipe ta sa golenchar kai mai angle cherenale,
O Kristo saia kovlo kana krustosarde le, a akana zivil cheres e zor e Devleki. A isto gia e Kristoia amen sam kovle, a lea ka zivi pala e zor e Devleki te sai pomozi tumen.
Mislin tumen sar zivin, te dikhen dal pachan chachimaia ando Kristo, zumaven tumen isto tumen. A so, ¿Ni acharen kai o Kristo si ande tumende? ¡A sai avelpe kai ande gua zumadipe ka dikhen kai o Kristo inai ande tumende!
Amen moli amen e Devleke tumen te na cheren niso bilacho, ta galea inai kai amen manga te sikava kai nakhlam sukar gava zumadipe, so amen manga gale ezgodaia si, tumen te cheren o lachipe i te dikhola kai amen ni nakhlam sukar gava zumadipe.
Pisiu tumenge gava lil mai anglal te llau te dikhav tumen, gia kana ka llau te na avav zuralo tumenchar. E zor kai dia man o Gazda, inai te zatriv tumen, gaia zor kai dia man si te sai vazdiniaol tumaro pachape.
Goleke phlalalen, mangav te zivin veselimaia ta te roden te aven chache ande tumaro zivoto. Den tumen zor iek avere ta zivin ande pas, ta o Del kai volil amen ta del amen e pas, ka avel tumenchar.