Chutichuan, kha ngei kha ka ziak a ni; chuti lo chuan, ka lo kal hunah, ka lâwmna tûrte lakah chuan lungngaihna ka hmu zâwk dah ang e; ka lâwmna chu in zaa lâwmna a nih ka rinsak hlawm si che u a.
Mittui tam tak tla chungin, thinlung hrehawm leh thlaphâng êm êma ka ziak a nih kha; chu chu tihlungngaiha in awmna tûr a ni lo va, in chunga hmangaihna nasa lehzual ka neih hi in hriat theih zâwkna tûrin a ni.
Nimahsela, tu pawhin mite a tihlungngaih chuan, keimah chauh mi tilungngai a ni lo va, (ka tih luattuk lohna tûrin) in zain a tilungngai hlek ṭheuh zâwk che u a ni.
Chutichuan, hrem leh tawh ahnêkin in ngaidamin in thlamuan zâwk tûr a ni; chuti lo chuan, eng emaw tiin mi chutiang chu a lungngaih lutuknain a lem zo dah ang e.
Eng kawngah pawh mi in ngaihdam apiang, kei pawhin ka ngaidam ve a; kei pawhin ka ngaihdam tawh sa chu, eng pawh ka lo ngaihdam tawh chuan nangmahni avângin Krista hmaah chuan ka ngaidam a ni;
ka unaupa Tita chu ka hmuh loh avângin ka thlarau lamah chuan muanna rêng rêng ka nei chuang lo va; chutichuan, anni chu ṭawng ṭhain ka ṭhen a, ka chhuak a, Makedonia ramah ka kal ta a.
pâwl khatte tân chuan thihna lakah thihna tûr rim kan lo ni a, pâwl khatte tân chuan nunna laka nunna tûr rim kan lo ni a. Chûng ang atân chuan tu nge tling zo vang?
Mi tam takin Pathian thu hi mite buma sumdâwn nân an hmang angin keini zawngin kan hmang ve si lo va; tihtak zet zâwkin, Pathian tirh zâwkin, Pathian mit hmuhin Kristaah chuan thu kan sawi ṭhîn a ni.