×

आहिराणी नवा करार

योहान ना पहिला पत्र 3

1
काय आमी परत आपला विषय मा गर्व कराले लागी जायेल शेतस? काय दुसरा लोकस सारख हय आमना साठे आवश्यक शे कि आमी तुमले शिफारीशपत्र दाखाळूत कि तुमी लोकस पासून मांगुत.
2
तुमी स्वता एक पत्र ना सारखा शेतस जो आमना साठे वशिला देस. आणि हरेक झन एले वाचू सकस आणि तुमना मधमा आमना करेल कामस्ले वयखू सकस.
3
हय प्रकट शे, कि तुमी ख्रिस्त ना पत्र ना सारखा शेतस, हय पत्र आमनी सेवकाई ना परिणाम शे. जेले शाई कण नई आणि दघळ ना पाट्यास्वर नई पण जीत्ती परमेश्वर नि आत्मा कण माणसस्ना हृदय ना पाट्यास्वर लिखामा एयेल शे.
4
आमी ख्रिस्त ना द्वारे परमेश्वर वर असाच विश्वास ठेवतस.
5
आमी हय नई सांगतस कि आमना मा स्वता कण काही करानी योग्यता शे, पण परमेश्वर आमले हय योग्यता देस.
6
जेनी आमले नवा करार ना सेवक होवाना योग्यता दियेल शे, आमी मोशे द्वारे लिखामा एयेल नियम ना सेवक नई पण पवित्र आत्मा ना सेवक शे. कारण कि मोशे द्वारे लिखेल नियम ना पायन नई कराना परिणाम त मृत्यु शे, पण पवित्र आत्मा जीवन देस.
7
जव परमेश्वर नि मोशे ले दघळ ना पाट्यास्वर लिखेल नियम दिधात, त परमेश्वर नि तेजमय महिमा प्रगट हुईनी. आठ लगून कि इस्त्राएल देश ना लोक मोशे ना तोंड ले त्या प्रकाश मुळे जो क्षण भर ना होता नई देखू सकनात. एनासाठे जर मृत्यु उत्पन्न करणार मोशे ना नियम ना सेवाकार्य इतला तेजमय होता,
8
त पवित्र आत्मा ना मार्गदर्शन मा नवीन करार ना आधीन सेवा ना कार्य आखो बी तेजमय कण भरेल ऱ्हायीन.
9
कारण कि जव दोषी ठरणार करार तेजमय होता, त मंग धर्मी ठरणार करार आखो बी जास्त तेजमय राहीन.
10
खर तर, जुना करार ना तेज नवा करार ना तुलना मा जास्त तेजमय नई ऱ्हायना.
11
एनासाठे, जव जुना करार, जो आते दूर करामा एयेल शे, इतला तेजमय होता, त नवा करार जो कायम ना साठे स्थिर ऱ्हास, तेना तून बी जास्त तेजमय राहीन.
12
एनासाठे अशी आशा ठियसन आमी हिंमत कण बोलतस.
13
आमी मोशे ना सारखा नई शेतस, जेनी आपला तोंड वर परदा टाकेल होता, एनासाठे कि इस्त्राएल देश ना लोक त्या तेज ले नई देखी सकोत जो घटा वर होता.
14
पण त्या मति-मंद हुई ग्यात, कारण कि आज लगून जुना करार ना नियमले वाचता टाईम ले तेस्ना हृदयस्वर तोच परदा पडेल ऱ्हास, पण तो परदा ख्रिस्त वर विश्वास कराना द्वारे दूर हुई जास.
15
आणि आज लगून जव कदी मोशे ना नियम वाचामा एस, त तेना हृदय वर परदा पडेल ऱ्हास, आणि एनासाठे त्या तेले पूर्णपणे समजू नई सकतस.
16
पण जव कदी त्या प्रभु येशु वर विश्वास करतीन, त तेस्ना हृदय वरना परदा उठी जाईन.
17
प्रभु त आत्मा शे, आणि जठे-कोडे प्रभु ना आत्मा शे, तठे करार कण स्वतंत्रता शे.
18
जठलोंग आमी सर्वास्ना प्रश्न शे, आमना मुख वर परदा नई शे आणि आमी सर्वा आरसा ना सारखा प्रभु नि महिमा ले देखतस. ह्या प्रकारे आमी धीरे-धीरे प्रभु ना तेजोमय प्रतिरूप मा रुपांतरीत हुई जातस आणि तो रूपांतरण प्रभु म्हणजे आत्मा ना कार्य शे.
Ahirani Bible
Ahirani Bible (आहिराणी) by The Love Fellowship is licensed under Creative Commons Attribution-ShareAlike 4.0 License
:
Save Notes