Kaimi lawng ahuepla thaihu sai boeih oen yarau saina boeih te ka hoett u poen; kaimi lawng thailatna ka sai u nawh, Pathen kah awl khaw asoeng a kam nawh la ka thui u nawh. Kaimi tah Pathen mik huh ah awltak aangna dawngah ka hing u tih thlaang boeih kah athetheen mingna kawpoek te atheenna ham kamami oen kamami he phep u ham ka yawm u.
Kaimi lawng kamami kawng he ka thui u nawh; kaimi lawng Jesuh Khrih tah Bawipa ni tila ka thui u tih Khrih hamla kaimi he nangmi kah tuihyoeihthlaang la ka awm u.
Tede Pathen tengah saithaina asang koek te awm tih mami tengah awm nawh tite a tuengna ham Muithla ben ro thaihu khuehkung mami he tah dilai-am mailai la ni n'awm mai.
raal-asa broela awm de, paya khatca khaw khueh muehla tah n'awm aih nawh; mami he nganbawh tah broela n'yawkk sak u poen de a duek tah n'duek u aih nawh.
He ang thli boeih he tah nangmi hamla ni, Pathen lungvatna lawng thlaang yahawh tengah a pha tare van angla Pathen ruep-awmna hamla ahimi lawng awmngaih ciil a thui khaw yahawh van ai.
He tila a awm dawngah metuek vengah khaw kaimi tah ka kaw boet nawh. Mami kah pumtaksa he voehvoeh ah tlum ahonn ngoen cakhaw, mami kah muithla hingna tah hin at coeng hin at athaaila coengg tare hang.