अपर अहां सर्मा दे गुप्त कम्मां जो छड्डी दित्या ऐ, कने ना चलाकी करदे, कने ना परमात्मे दे वचने जो अपणे फायदे तांई सणांदे हन। अपर अहां परमात्मे सामणै सिर्फ सच्चाई दस्सदे हन, तांजे हर इक्क माणु एह़ गवाही दैं, कि अहां सच्च ग्लांदे हन।
इस संसारे दे ईश्वर सैताने तिन्हां बेबसुआसियां दिया अक्ला जो भ्रष्ट करी दित्या ऐ, जिसा बज़ाह ते सैह़ मसीह दे सुसमाचारे कने तिसदिया चमका जो नीं समझी सकदे। क्जोकि मसीह परमात्मे दा स्वरूप ऐ।
क्जोकि अहां अपणे बारे च नीं, अपर यीशु मसीह दे बारे च प्रचार करदे हन, कि सैह़ प्रभु ऐ। कने तिसदे बारे च एह़ ग्लांदे हन, कि तिन्हीं अहां जो तुहां दे सेवक होणे तांई घल्लेया।
इसतांई कि परमात्मे ग्लाया, “नेहरे ते जोत्ती चमके,” कने परमात्मे अहां दे मनां च इक्क जोत्ती साइआं समझ दित्ती, तांजे अहां परमात्मे दिया महिमा जो दिक्खी सकन, जेह्ड़ी यीशु मसीह च प्रगट हुंदी ऐ।
अहां हमेसा अपणे सरीरे च तिन्हां गल्लां जो मसूस करदे हन, जाह़लू यीशु मसीह तिसा दर्दनाक मौत्ती ते गुजरेया, जेह्ड़ी तिन्हीं झेली, तांजे लोक अहां दे कम्मां च यीशु मसीह दिया ज़िन्दगिया जो दिक्खन।